![](img/news/04/44/00/default.jpg)
Թուրքիայի վարչապետ Ռեջեփ Թայիփ Էրդողանը արաբական «Ալ Ջազիրա» հեռուստաընկերությանը տված հարցազրույցում խիստ քննադատության է ենթարկել Իսրայելի արտգործնախարար Ավիգդոր Լիբերմանին՝ նշելով, որ Իսրայելին անհրաժեշտ է ազատվել նրանից։
Թուրքիայի վարչապետը նշել է, թե լարված հարաբերությունների խնդիրը Իսրայելինն է, քանի որ եթե Լիբերմանի պաշտոնավարությանը վերջ չդրվի, թուրք-իսրայելական հարաբերությունները ավելի կվատանան։ «Ով ուզում է լինի, եթե թուրքերի հասցեին նման խոսքեր է ասում, թող նայի հայելու մեջ եւ տեսնի անարժան մեկին»,-ասել է Էրդողանը։
«Եթե Իսրայելի կառավարությունն իր քաղաքականությունը չփոխի, մեր դիրքորոշման մեջ փոփոխություն չի սպասվում։ Նեթանյահուի կառավարությունը կարող է դառնալ Իսրայելի պատմության ամենավատ կառավարությունը։ Մինչ իսրայելցիները չփոխեն իրենց քաղաքականությունը, թուրքերը նրանց հետ սեղան չեն նստի։ Իսրայելի հետ կնքված համաձայնագրերն էլ չեմ վերահաստատի»,-շեշտել է Թուրքիայի վարչապետը։
Էրդողանը հիշեցրել է, որ Իսրայելը պետք է ներողություն խնդրի Թուրքիայից՝ «Մավի Մարմարա» նավի դեմ գործողության համար եւ փոխհատուցում վճարի սպանված 9 թուրքերի ընտանիքներին։