Ամերիկյան Lockheed Martin ընկերությունը ԱՄՆ աերոգնացության եւ տիեզերական տարածքի հետազոտության ազգային վարչության (NASA) հետ պայմանագիր է կնքել ուղեւորատար գերձայնային օդանավ ստեղծելու մասին: Փորձնական թռիչքը նախատեսված է 2021 թվականի վերջին, փոխանցում է ՏԱՍՍ-ը:
Պայմանագրի արժեքը կազմում է 247,5 մլն դոլար: Մշակմամբ կզբաղվի Lockheed Martin-ի Skunk Works կոչվող ստորաբաժանումը: Տեխնիկական հանձնարարությունը, այսպես կոչված, X-Plane-ի նախագծումն է, կառուցումը եւ թռիչքային փորձարկումների անցկացումը:
Նախագծի հիմքում դրված է NASA-ի մշակած ձայնային պատնեշի հաղթահարման անաղմուկ տեխնոլոգիան: Ժամանակակից կործանիչների մեծ մասը կարող է զարգացնել գերձայնային արագություններ (1191,6 կմ/ժ-ից բարձր), սակայն թռչելուց հետո արձակվում է խլացնող աղմուկ, որն առաջանում է, այսպես կոչված, ձայնային հարվածով: Հենց այս պատճառով է քաղաքացիական ավիացիայի օդանավերին արգելվում գերձայնային թռիչքների իրականացումը: NASA-ն եւ Lockheed Martin-ը ծրագրում են «ստեղծել աղմուկի թույլատրելի մակարդակի ստանդարտ» «գերձայնայինի» անցնելիս:
