ԱՄՆ Կենտրոնական հետախուզական վարչության տնօրեն, պետքարտուղարի թեկնածու Մայք Պոմպեոն խոստացել է «ամրապնդել» Իրանի միջուկային համաձայնագիրը։ Իր թեկնածության հաստատման համար հրավիրված Սենատի լսումների ժամանակ ելույթով հանդես գալով՝ նա հայտարարել է, որ կանի ամեն ինչ, որ մինչեւ մայիսի 12-ը Եվրոպայի դաշնակիցների հետ պայմանավորվի համաձայնագրի վերանայման շուրջ, գրում է AFP-ն։
Այս վերջնաժամկետն է սահմանել նախագահ Դոնալդ Թրամփը Իրանի հետ համաձայնագրի վերանայման համար՝ հակառակ դեպքում սպառնալով համաձայնագրից ԱՄՆ-ի դուրս գալով։
Լինելով կոնգրեսական՝ Պոմպեոն հանդես էր գալիս այդ գործարքի քննադատությամբ, ուստի նրա նշանակումը սրեց այն մտավախությունը, որ ԱՄՆ-ն կարող է հրաժարվել համաձայնագրից։
Լսումների ժամանակ Պոմպեոն ձգտել է ընդգծել դիվանագիտության կարեւորությունն այս հարցում․ «Ես ցանկանում եմ շտկել այդ գործարքը։ Դա իմ նպատակն է»,-ասել է նա։
Պատասխանելով հարցին, թե իրականացնում է Իրանն համաձայնագրի իր մասով պարտավորությունները, Պոմպեոն նշել է, որ հակառակն ապացուցող ապացույց մինչ այժմ չի տեսել։
