ՀՀ նախագահ Արմեն Սարգսյանն ապրիլի 18-ին ստորագրել է «Հայաստանի Հանրապետության` մի կողմից, եւ Եվրոպական միության եւ ատոմային էներգիայի եվրոպական համայնքի ու դրանց անդամ պետությունների՝ մյուս կողմից, միջեւ Համապարփակ եւ ընդլայնված գործընկերության» համաձայնագիրը վավերացնելու մասին օրենքը:
Ավելի վաղ NEWS.am-ը հայտնել էր, որ Հայաստան-ԵՄ համաձայնագիրը ստորագրվել է 2017-ի նոյեմբերի 24-ին Բրյուսելում, ապա Ազգային ժողովն այն վավերացրել է ապրիլի 11-ին:
Այս համաձայնագիրը գալիս է փոխարինելու 1999 թվականից գործող «Գործընկերության եւ համագործակցության մասին» Հայաստանի եւ ԵՄ-ի միջեւ համաձայնագրին, որի ժամկետը սպառվել է 2009-ին եւ անընդհատ երկարացվում էր:
ԱԳ փոխնախարար Կարեն Նազարյանի խոսքով, փաստաթղթում քաղաքական հարցերը զետեղված են նախաբանում, երկրորդ մասում քաղաքական երկխոսության եւ բարեփոխումներին, անվտանգության ոլորտում համագործակցության վերաբերող դրույթներն են, երրորդ մասը արդարադատությանը եւ մարդու իրավունքներին առնչվող խնդիրների մասին է:
«Համաձայնագրում առանձնակի հստակ անդրադարձ կա ԼՂ խնդրին: Այն վերահաստատում է ԵՄ հայտարարված հանձնառությունը աջակցել ԵԱՀԿ Մինսկի խմբի համանախագահների կողմից ԼՂ հակամարտության կարգավորման ջանքերին ու մոտեցումներին՝հիմնված միջազգային իրավունքի նորմերի ու սկզբունքների վրա. մասնավորապես ուժի եւ ուժի սպառնալիքի չկիրառման, ժողովուրդների ինքնորոշման եւ տարածքային ամբողջականության վրա:
Հայաստանի՝ ԵՄ մուտքի արտոնագրերի վերաբերյալ երկխոսության հարցն ունի առանձին հոդվածներ: Փաստաթղթում խոսվում է, որ Հայաստանն աստիճանաբար իր օրենսդրությունը մոտարկելու է ԵՄ օրենսդրությանը, որպես բարեփոխումներին ուղղված քայլ:
Հայաստան-ԵՄ համաձայնագիրը բաղկացած է հիմնական տեքստից եւ շուրջ 12 հավելվածներից, որոնք վերաբերում են ոլորտային քաղաքականությանը՝ տրանսպորտ, էներգետիկա, շրջակա միջավայր, կլիմայի փոփոխություն, տեղեկատվական հասարակական ոլորտում համագործակցություն, սպառողների պաշտպանություն, զբաղվածություն, սոցիալական քաղաքականություն եւ հավասար հնարավորություններ, պետական գնումներ, ֆինանսական աջակցություն, խարդախության դեմ պայքար եւ այլն:
Նա տեղեկացրել է, որ Համաձայնագրով ձեւավորվում է Հայաստան-ԵՄ հարաբերությունները ղեկավարող եւ համակարգող ինստիտուցիոնալ շրջանակ: Ըստ այդմ, Գործընկերության խորհուրդը բարձրագույն քաղաքական մարմինն է՝ բաղկացած կողմերի նախարարական մակարդակով ներկայացուցիչներից; Այն իրականացնելու է համաձայնագրի կիրակման գործընթացի վերահսկումն ու գնահատումը: Գործընկերության կոմիտեն, որը բաղկացած է կողմերի բարձրաստիճան պաշտոնյաներից, աջակցելու է գործընկերության խորհրդին, կարող են ստեղծվել նաեւ ենթակոմիտեներ: Համաձայնագրով նախատեսված է նաեւ խորհրդարանական վերահսկման մեխանիզմ:
Կլինի նաեւ կողմերի քաղաքացիական հասարակության ներկայացուցիչներից կազմված հարթակ, որի գործողության կարգը ենթադրում է թափանցիկության եւ ռոտացիայի սկզբունքը:
- Ինչ գլուխներից է բաղկացած ՀՀ-ԵՄ համաձայնագիրը. հատուկ անդրադարձ կա ԼՂ խնդրին. Ներկայացնում է ԱԳ փոխնախարարը
- Հայաստան-ԵՄ համաձայնագրում Մեծամորի ատոմակայանը փակելու մասին որեւէ ձեւակերպում չկա. փոխնախարար
- Եթե ՌԴ-ն ցանկանա ատոմակայան կառուցել Հայաստանում, մենք կօգտվենք այդ առիթից. փոխնախարար
- Հույս ունենք, որ Ադրբեջան-ԵՄ համաձայնագրում Բրյուսելը կպահպանի իր դիրքորոշումը Արցախի հարցի շուրջ. փոխնախարար
- Մոտ ժամանակներս ԵՄ-ի կողմից մեզ կտրվի վիզաների ազատականացման մեկնարկի գործողության ծրագիրը. փոխնախարար