Բլոքչեյն տեխնոլոգիաների վրա հիմնված ընկերությունների 99 տոկոսը կտապալվի, սակայն մնացած 1 տոկոսը աշխարհը կփոխի: Նման տեսակետ հայտնեց Ջուան Լին՝ NexChange ընկերության հիմնադիրը, որը ներդրումներ է կատարում ինովացիոն արտադրանքի եւ ընկերությունների մեջ:
Նրա փոխանցմամբ՝ ժամանակին գրեթե նույն բանն է տեղի ունեցել դոթկոմի հետ՝ ընկերությունները, որոնց բիզնես մոդելն ամբողջությամբ հենված էր ինտերնետում աշխատանքի վրա, մեծ տարածում են գտել 1990-ականներին՝ ինտերնետ բումի ժամանակներում, 2000 թվականին դոթկոմի բումն ավարտվեց, եւ NASDAQ ինդեքսի անկման հետ միասին սնանկացան հարյուրավոր ընկերություններ: Սակայն ջրի երեսին մնացած ընկերությունների 1 տոկոսը աշխարհը փոխեց, նրանց թվում՝ «Ամազոնը», ընդգծեց Ջուան Լին:
Նրա խոսքով՝ իր ընկերությունը գերադասում է ներդրումներ կատարել զարգացող, այլ ոչ զարգացած տնտեսությամբ երկրների ինովացիոն նախագծերի մեջ, ուստի հայկական ընկերություններն ու սթարթափերը իր համար այսօր մեծ հետաքրքրություն են ներկայացնում:
«Եթե Սան Ֆրանցիսկո կամ Լոնդոն գնամ, այնտեղ չեմ կարողանա այնպիսի բան անել, որը մեծ փոփոխությունների կհանգեցնի, քանի որ արդեն շատ զարգացած տնտեսություն ունեն: Ինձ ավելի շատ հետաքրքրում են վայրերը, որտեղ իմ ներդրումները կարող են լուրջ փոփոխություններ առաջացնել, եւ որտեղ բլոքչեյն տեխնոլոգիաների ներդրման շնորհիվ տնտեսությունը կարող է մեծ առաջընթաց կատարել»,- նշեց է ներդրողը:
Նա հավելեց, որ հայկական ընկերությունների հետ համագործակցելու կոնկրետ ծրագրեր դեռեւս չկան. առայժմ սոսկ Հայաստանին է ծանոթանում, ուսումնասիրում նրա շուկան:
Նրա կարծիքով, սակայն, ցանկացած երկրում բլոքչեյն տեխնոլոգիաները կիրառման 2 կարեւոր ոլորտ ունեն՝ ֆինանսական ծառայությունները եւ լոգիստիկան:
«Ցանկացած բարդ իրավիճակում բլոքչեյն տեխնոլոգիան կարող է մեծ թվով օգտակար լուծումներ առաջարկել»,- նշեց Ջուան Լին:
Ջուան Լին Հայաստան է եկել՝ մասնակցելու Armenian Blockchain Forum առաջին միջազգային համաժողովին:
