Վարչապետի պաշտոնի միակ թեկնածուն «Ելք» խմբակցության ղեկավար Նիկոլ Փաշինյանն է: Այսօր ժամը 18:00-ին լրացավ խմբակցությունների կողմից թեկնածուների առաջադրման վերջնաժամկետը, եւ թեկնածու է առաջադրել միայն «Ելք»-ը: ՀՀԿ, «Ծառուկյան» եւ ՀՅԴ խմբակցությունները թեկնածու չառաջադրելու մասին հայտնել էին ավելի վաղ: ՀՅԴ-ն բոլոր խմբակցություններին առաջարկել էր միասնական թեկնածու առաջադրել Նիկոլ Փաշինյանին:
Նշենք, որ Ազգային ժողովը Հայաստանի վարչապետին կընտրի վաղը՝ մայիսի 1-ին գումարվելիք հատուկ նիստում: Հանրապետական կուսակցությունը խորհրդարանում ունի 58 մանդատ, «Ծառուկյան» դաշինքը՝ 31, «Ելք»-ը՝ 9, ՀՅԴ-ն՝ 7 մանդատ: Վարչապետի ընտրության համար անհրաժեշտ է 53 ձայն, իսկ սա նշանակում է, որ եթե վաղվա նիստին ներկայանան երեք խմբակցությունների բոլոր պատգամավորները, Նիկոլ Փաշինյանին ընտրվելու համար անհրաժեշտ կլինի եւս 6 ձայն: Եթե վարչապետ չընտրվի, Ազգային ժողովը կցրվի: Խորհրդարանը կցրվի նաեւ, եթե չհաստատի նորընտիր վարչապետի ձեւավորած կառավարության ծրագիրը: Այդ դեպքում արտահերթ ընտրությունները պետք է տեղի ունենան դրանից ոչ շուտ, քան 30 եւ ոչ ուշ, քան 45 օր հետո: Կա նաեւ երրորդ տարբերակ. կառավարությունը բերում է ծրագիր եւ դնում իր վստահության հարցը: Դա կարող է տեղի ունենալ միայն վարչապետի ընտրությունից մեկ տարի հետո:
Նիկոլ Փաշինյանն այսօր հանդիպել է խորհրդարանական խմբակցությունների հետ: Դաշնակցությունից Արմեն Ռուստամյանը վստահեցնում է, որ սկզբունքային հարցերում իրենց եւ «Ելք»-ի մոտեցումները չեն տարբերվում: Իսկ նոր կառավարության մաս կազմելու հարց, նրա խոսքով, չեն քննարկել: Նաիրա Զոհրաբյանը նույնպես պնդում է, որ կոալիցիոն համագործակցության հարց չեն քննարկել. իրենք շարժմանը միացել եւ Փաշինյանի թեկնածությունը սատարելու որոշում են կայացրել առանց նախապայմանների:
ՀՀԿ-ի հետ հանդիպման ժամանակ քվե խնդրելու մասին պատգամավորներից մեկի հարցին ի պատասխան՝ Նիկոլ Փաշինյանը հայտարարել է, որ չի եկել որեւէ մեկից որեւէ բան խնդրելու: Իսկ Ազգային ժողովի խոսնակ Արա Բաբլոյանը բլից-հարցում է անցկացրել Փաշինյանի հետ: Հարցման հիմնական նպատակը, կարծես, ապացուցելն էր, որ մինչեւ 2008 թվականը Հայաստանում ազատ խոսքի եւ ազատորեն հանրահավաքների մասնակցության հնարավորություն չի եղել:
Հանրահավաքների ժամանակ տնտեսական ոլորտի մասին խոսելիս Փաշինյանը պարբերաբար հայտարարում էր, որ առանց բացառության բոլորին հարկային դաշտ պետք է բերել: Լրագրողներն այսօր այդ մասին հարց են ուղղել գործարար-պատգամավոր Սամվել Ալեքսանյանին:
Խորհրդարանում հանդիպումներից հետո Նիկոլ Փաշինյանը շտապել է Գարեգին Նժդեհի հրապարակ: Այստեղից երթ է մեկնարկել դեպի Հանրապետության հրապարակ, որտեղ էլ կայացել է ավանդական հանրահավաքը: Որոշել են վաղը 11:00-ին հավաքվել հրապարակում ու նորից տոնել շարժման հաղթանակը:
Ազգային անվտանգության ծառայությունը հայտնել է ահաբեկչության հերթական փորձը կանխելու մասին: Ծառայության հաղորդագրության համաձայն՝ Ռուսաստանի քաղաքացի, Մախաչկալայի բնակիչ Սուլեյմանհաջի Բագանդհաջիեւը փորձել է իր լուսանկարով, սակայն այլ անձի տվյալներով՝ Ուկրաինայի քաղաքածու կեղծ անձնագրով Հայաստան մուտք գործել: Քրեական գործ է հարուցվել, կասկածյալը կալանավորված է: ԱԱԾ-ի նախնական տվյալներով՝ Բագանդհաջիեւը հավաքագրվել ու վարձատրվել է միջազգային ահաբեկչական կազմակերպություններից մեկի կողմից եւ 2015 թվականի մայիսից մասնակցում է Սիրիայում զինված ընդհարումներին: Ներկայում ԱԱԾ-ն փորձում է պարզել Հայաստան նրա ժամանման հանգամանքներն ու իրական նպատակները:
«Արսենալի» կիսապաշտպան Հենրիխ Մխիթարյանը խաղադաշտ վերադարձը նշեց իր նախկին ակումբի՝ «Մանչեսթեր Յունայթեդի» դարպասը խփած գոլով: Անգլիական Պրեմյեր լիգայի 36-րդ տուրում «Մանչեսթեր Յունայթեդն» ընդունեց «Արսենալին» եւ 2:1 հաշվով հաղթեց լոնդոնյան ակումբին: Ծնկի վնասվածքից հետո խաղադաշտ վերադարձած Մխիթարյանը, փաստորեն, դարձավ Արսեն Վենգերի գլխավորած թիմի միակ գոլի հեղինակը: 29-ամյա ֆուտբոլիստը խաղադաշտից բացակայում էր ապրիլի 5-ից: «Մանչեսթեր Յունայթեդի» դեմ խաղում, սակայն, Մխիթարյանը նորից ծնկի վնասվածք է ստացել: Առաջիկա օրերին հայտնի կդառնա, արդյո՞ք նա կկարողանա մասնակցել Մադրիդի «Աթլետիկոյի» դեմ խաղին: «Արսենալը» Մադրիդում Եվրոպայի լիգայի կիսաեզրափակիչի պատասխան հանդիպումն «Աթլետիկոյի» հետ կանցկացնի մայիսի 3-ին:
Արթուր Աբրահամը նվաճել է WBO International-ի տիտղոսը: Պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի նախկին չեմպիոն Արթուր Աբրահամը WBO International-ի թափուր տիտղոսի համար մենամարտել է դանիացի Պատրիկ Նիլսենի հետ: 12 ռաունդով մենամարտում հայ բռնցքամարտիկը հաղթանակ է տարել երեք մրցավարներից երկուսի դրական որոշման շնորհիվ: Այս վարկանիշային մենամարտում գրանցած հաղթանակի շնորհիվ Արթուր Աբրահամն առաջիկայում կկարողանա մենամարտել աշխարհի չեմպիոնի կոչման համար:
Մայիսի 1-ին եւ 2-ին հանրապետությունում սպասվում է առանց տեղումների եղանակ: Օդի ջերմաստիճանը 4-6 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +9+11, ցերեկը՝ +21+23 աստիճան տաքություն: