Մենք միշտ էլ պատրաստ ենք եղել ընտրությունների, առավել եւս հիմա պատրաստ ենք. թեկուզ հենց վաղը լինեն, խնդիր չունենք: Այս մասին, այսօր՝ մայիսի 1-ին, ԱԺ-ում լրագրողների հետ զրույցում նշեց «Ծառուկյան» խմբակցության ղեկավար Գագիկ Ծառուկյանը:
«Ժողովուրդը զգացել է, որ իր ձայնը կարեւոր է, միասնականությունը հաղթում է: Ում կվստահի ժողովուրդը, նրան էլ թող ձայն տա»,-ասաց նա:
Լրագրողները բոլոր կողմերից սկսեցին հարցեր տալ, ինչը բարկացրեց Ծառուկյանին եւ նա սաստեց. «Թողեք խոսքս ավարտեմ, հետո հարցրեք»:
«Ծառուկյան» խմբակցության պատգամավոր Նաիրա Զոհրաբյանը եւս կողքից նշեց. «Թող խոսքն ավարտի նոր»,- ինչին Ծառուկյանն արձագանքեց. «Նառա, դու սուս»:
Հարցին, թե ժամանակավոր կառավարության հետ համագործակցություն լինելո՞ւ է, Ծառուկյանը պատասխանեց. «Ես չեմ պատկերացնում, հանդիպել ենք Նիկոլ Փաշինյանի հետ և քննարկել ենք, թե այս իրավիճակից դուրս գալու համար ինչ է պետք անել, քննարկել ենք կարճ: Ինձ թվում է` հետագայում նորից կքննարկենք»,- նշեց հա ՝ հավելելով, թե իրենց «սազական» չէ պաշտոնների հարց քննարկելը:
ԲՀԿ առաջնորդը նաեւ նշեց, որ որեւէ պաշտոնի հարց չի քննարկվել Փաշինյանի հետ. «Մենք պատրաստ ենք մեր ձայները անշահախնդիր տալու, որովհետև այսօր այս իրավիճակը առաջացել է հիմնականում ժողովրդին չլսելով: Ես հարգում եմ իմ ժողովրդին և ժողովրդի որոշումը ինձ համար ընդունելի է»:
Ծառուկյանին հարցրին նաեւ իր հասցեին Փաշինյանի կողմից ժամանակին արված քննադատությունների մասին, որ չի վճարում հարկերը, ինչին նա պատասխանեց. «Ծառուկյանը մաքուր ա, ով ուզում ա, թող գա, ստուգի, ումը պետք է ստուգեն, չեն ստուգում»: