Սեպտեմբերի 15-ին ՀՀ ԱԳ նախարարի տեղակալ Կարինե Ղազինյանը ընդունել է Երեւանում գտնվող Եվրոպական հանձնաժողովի պատվիրակությանը, որի կազմում էին Եվրոպական հարեւանության քաղաքականության համակարգման տնօրինության ղեկավար Ռուտգար Վիսելսը, Եվրոպական Վարչական հարցերի, աուդիտի եւ կեղծարարության դեմ պայքարի գծով հանձնակատարի աշխատակազմի ղեկավար Հենրիկ Հոլոլեին եւ արտաքին հարաբերությունների գլխավոր տնօրինության Ուկրաինայի, Բելառուսի, Մոլդովայի եւ Հարավային Կովկասի բաժնի ղեկավար Ջոն Կյաերը:
Պատվիրակությանն ուղեկցում էին ՀՀ-ում ԵՄ պատվիրակության ղեկավար` դեսպան Ռաուլ դե Լյուցենբերգերը: Հանդիպման ընթացքում ԵՀ պատվիրակությունը ներկայացրել է Արեւելյան գործընկերության շրջանակներում նախատեսվող առաջիկա ծրագրերը: Փոխնախարար Ղազինյանը վերահաստատել է ՀՀ պատրաստակամությունը՝ խորացնել հարաբերությունները ԵՄ հետ՝ հույս հայտնելով, որ Արեւելյան գործընկերությունը նոր լիցք կհաղորդի ինչպես ՀՀ-ԵՄ այնպես էլ տարածաշրջանի երկրների միջեւ բազմակողմ համագործակցությանը: ԱԳ փոխնախարարը հատկապես կարեւորել է ՀՀ քաղաքացիների համար ԵՄ երկրներ մուտքի արտոնագրեր ստանալու գործընթացի դյուրացման խնդիրը՝ նշելով, որ այդ նպատակով ՀՀ իշխանությունները պատրաստ են անհրաժեշտ իրավապայմանագրային հարաբերություններ հաստատել Եվրամիության հետ: