Մշակույթի մի շարք գործիչներ այս պահին բողոքի ակցիա են իրականացնում Մշակույթի նախարարության շենքի դիմաց:
NEWS.am-ի թղթակիցը հայտնում է, որ նրանք պահանջում էին, որ մշակույթի նախարարի պաշտոնակատար Արմեն Ամիրյանը նույնպես միանա իրենց: Քիչ առաջ գործիչներին հանդիպեց Արմեն Ամիրյանը: Նա հայտարարեց, որ ինքը պետք է կատարի նախարարի պաշտոնակատարի պարտականությունները: Ակցիայի մասնակիցները, սակայն, նախարարության մոտից չեն հեռանում, նրանք ասում են՝ կմնան այնքան, մինչեւ Ամիրյանն իջնի ու իրենց հետ գնա Հանրապետության հրապարակ՝ հանրահավաքի: Նշենք, որ ակցիայի մասնակիցների մեջ է երգիչ Արամոն, դերասանուհի Ելենա Բորիսենկո եւ այլ դերասաններ:
Նշենք, որ Ազգային ժողովը մայիսի 1-ին 45 կողմ եւ 56 դեմ ձայներով մերժեց Նիկոլ Փաշինյանի թեկնածությունը ՀՀ վարչապետի պաշտոնում: Նրան դեմ դեմ է քվեարկել ՀՀԿ խմբակցությունը:
Դրանից հետո կայացած հանրահավաքում Փաշինյանը կոչ է արել վերադառնալ քաղաքացիական անհնազանդության խաղաղ, ոչ բռնի ակցիաներին: «Վաղը ամբողջ հանրապետությունում հայտարարվում է տոտալ գործադուլ եւ դասադուլ, առանց բացառության բոլոր ընկերություններում: 8:15-ից շրջափակվում են բոլոր փողոցները, մետրոն, մայրուղիները, օդանավակայանը, ամեն ինչ»,- ասել է Փաշինյանը:
