Հայաստանը նոր վարչապետ ունի: Այսօր գումարված Ազգային ժողովի հատուկ նիստում առաջադրված միակ թեկնածուի՝ «Ելք» խմբակցության ղեկավար Նիկոլ Փաշինյանի օգտին կողմ քվեարկեց 59 պատգամավոր, դեմ՝ 42-ը: Այսպիսով, Նիկոլ Փաշինյանը դարձավ Հայաստանի 16-րդ վարչապետը: Քվեարկությունից հետո նրա ելույթը հակիրճ էր:
Նախագահը Փաշինյանին վարչապետի պաշտոնում նշանակելու մասին հրամանագիր ստորագրեց: Ավելի ուշ Արմեն Սարգսյանը նաեւ հանդիպեց նորընտիր վարչապետի հետ եւ հորդորեց հնարավորինս արագ ձեւավորել կառավարությունը:
Նշենք, որ վարչապետի միակ թեկնածուին պաշտպանելու մասին հայտարարել էին «Ելք», «Ծառուկյան» եւ ՀՅԴ խմբակցությունները: Փաշինյանին օժանդակելու մասին հայտարարել էր նաեւ Հանրապետականը: Վահրամ Բաղդասարյանն այսօր վերահաստատեց. իրենց դիրքորոշումը չի փոխվել, մտահոգությունները չեն փարատվել, բայց բավարար թվով հանրապետական պատգամավորներ կքվեարկեն Փաշինյանի օգտին, որպեսզի Հայաստանը վարչապետ ունենա: ՀՀԿ խմբակցության ղեկավարը, միաժամանակ, Նիկոլ Փաշինյանին կոչ արեց կողմ քվեարկած պատգամավորներին իրենը չհամարել: Ի վերջո, Փաշինյանի օգտին քվեարկեց հանրապետական 13 պատգամավոր, մեծ մասը՝ գործարարներ:
Նոր կառավարության կազմում վարչապետն էական փոփոխություններ է կատարելու: Անուններ առայժմ չնշեց՝ պատճառաբանելով, թե դեռ քննարկումներ պետք է լինեն քաղաքական ուժերի հետ: Սակայն ուժային կառույցների ղեկավարների, մասնավորապես՝ պաշտպանության նախարարի մասին լրագրողների ճշտող հարցին, այնուամենայնիվ, պատասխանեց. փոփոխություն կլինի:
Իսկ որոնք են լինելու նորընտիր վարչապետի առաջին քայլերը: Վաղը Նիկոլ Փաշինյանը մեկնելու Արցախ, մայիսի 14-ին էլ պատրաստվում է մասնակցել Սոչիում կայանալիք ԵՏՄ գագաթնաժողովին:
Փաշինյանն արդեն շնորհավորանքներ է ստանում: Առաջիններից մեկը, ի դեպ, Հայաստանի նորընտիր վարչապետին շնորհավորել են Ռուսաստանի նախագահն ու վարչապետը: Իսկ Ազգային ժողովում կայացած քվեարկությանը հետեւեց պաշտոնանկությունների շարքը: Վարչապետի պաշտոնակատար Կարեն Կարապետյանը Փաշինյանին շնորհավորել է ընտրվելու կապակցությամբ եւ հայտարարել լիազորությունները դադարեցրելու մասին: Ավելի ուշ նա նաեւ հրաժարականի դիմում ներկայացրել է նախագահին:
Դաշնակցական պատգամավոր Սուրեն Մանուկյանը կուսակցական տույժի է ենթարկվել: ՀՅԴ հայաստանյան կառույցի ղեկավարը նշել է, որ Մանուկյանը մեկ տարի չի կարողանա մասնակցել կուսակցության ժողովներին: Իսկ տույժի պատճառն այն է, որ պատգամավորն առանց կուսակցության որոշման ապրիլի 25-ին հայտարարել էր համաժողովրդական շարժմանը միանալու մասին: Հիշեցնենք, որ կուսակցական որոշումն անտեսելու համար էլ օրերս պատգամավորական մանդատից հրաժարվեց եւ Դաշնակցությունից հեռացվեց Աղվան Վարդանյանը. նա չէր հետեւել ՀՅԴ խմբակցության որոշմանն ու մայիսի 1-ին դեմ էր քվեարկել վարչապետի թեկնածու Նիկոլ Փաշինյանին:
Այսօր Շուշիի ազատագրման օրն է. 26 տարի առաջ մայիսի 8-ին Արցախի Պաշտպանության բանակը եւ կամավորական ջոկատներն ազատագրեցին քաղաքը, որտեղից ադրբեջանցիներն անդադար գնդակոծում էին Ստեփանակերտն ու մերձակա գյուղերը: 1991 թվականի նոյեմբերից մինչեւ 1992-ի մայիս Շուշիից, Ջանհասանից, Քյոսալարից, Ղայբալուից Ստեփանակերտի վրա արձակվել է շուրջ 4740 արկ: Այդ հրետակոծությունների հետեւանքով զոհվել է 111 եւ վիրավորվել 332 խաղաղ բնակիչ, ավերվել 370 բնակելի տուն եւ շինություն: Շուշիի ազատագրումը բեկումնային դարձավ Ղարաբաղյան պատերազմում. այն տեւեց 26 ժամ եւ մայիսի 9-ին արդեն Շուշին ազատագրված էր: Այդ մարտերում հայկական կողմն ունեցավ 57 զոհ, թշնամին՝ շուրջ 300 սպանված, 600-700 վիրավոր, 13 գերի:
Գիշերը Հայաստան-Ադրբեջան սահմանը խախտելու փորձի ժամանակ հայ դիրքապահները 6 անձի են ձերբակալել. բոլորն օտարերկրացիներ են: Այս մասին տեղեկացրել է պաշտպանության նախարարի մամուլի քարտուղարը: Արծրուն Հովհաննիսյանը խոստացել է ավելի ուշ դեպքից այլ մանրամասներ ներկայացնել:
Լիսաբոնում կողոպուտի ժամանակ դանակով վիրավորել են հույն լրագրողի: Նա Պորտուգալիայում է «Եվրատեսիլ» երգի մրցույթը լուսաբանելու նպատակով: Անհայտ անձը մոտեցել է լրագրողին, դանակահարել եւ կողոպտել նրան: Տուժածը հոսպիտալացվել է, նրա կյանքին վտանգ չի սպառնում: Ըստ տեղեկությունների՝ տղամարդու մոտ բավական մեծ գումար է եղել՝ 4 հազար եվրո. այն նախատեսված էր մրցույթի կիսաեզրափակիչի տոմսեր գնելու համար: Կողոպտիչը փախուստի է դիմել:
Ինչ վերաբերում է մրցույթին. այսօր ուշ երեկոյան տեղի կունենա առաջին կիսաեզրափակիչը: 16 համարի ներքո ելույթ կունենա նաեւ այս տարի Հայաստանը ներկայացնող Սեւակ Խանաղյանը: Նա կներկայանա «Քամի» երգով:
Մայիսի 8-ին դոլարի վերելքը շարունակվել է, եվրոն շուրջ 2 դրամով էժանացել է: Դոլարի փոխարժեքը կազմել է 486 դրամ, եվրոյինը՝ 578, ռուբլունը՝ 7 դրամ 69 լումա, ֆունտինը՝ 657 դրամ:
Մայիսի 9-13-ը հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ, առանձին վայրերում՝ կարկուտ: Օդի ջերմաստիճանն էապես չի փոխվի: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +10+12, ցերեկը՝ +22+24 աստիճան տաքություն:
