Ֆրանսիայի ներքին գործերի նախարար Ժերար Կոլոնը կիրակի ժամը 10։00-ին գերատեսչությունում արտահերթ հավաք է հրավիրել Փարիզի ահաբեկչությունից հետո։ Այս մասին հաղորդում է BFMTV հեռուստաակիքը։
Հեռուստաալիքի տվյալներով՝ հավաքին մասնակցում են նախարարի օգնականները, Ֆրանսիայի հետախուզության ծառայության, Արդարադատության նախարարության, երկրում «Սանտինել» հակաահաբեկչական գործողություններն իրականացնող Զինված ուժերի ներկայացուցիչներ։ Հավաքին կվերլուծեն նախորդ գիշեր տեղ գտած իրադարձությունները եւ կդիտարկեն այն միջոցները, որոնք նպատակահարմար կլինեն այս առումով ընդունել։
Շաբաթ օրը երեկոյան ժամը մոտ 21։30-ին Փարիզի երկրորդ շրջանում՝ Մոնսինյե փողոցում՝ փարիզյան Օպերայի մոտ թաղամասում դանակով զինված անձը անկանոն հարվածներ է հասցրել անցորդներին։ Հարձակվողին տեղում չեզոքացրել են քաղաքային ոստիկանության աշխատակիցները։ Ավելի ուշ ոստիկանները պարզել են, որ ահաբեկիչը 20-ամյա չեչեն է, նրա ծնողները կալանքի տակ են առնվել, ոստիկանությունը նրանց հարցաքննում է։
Ոստիկանության տվյալներով՝ չարագործի գործողություններին զոհ է գնացել մեկ մարդ, 4-ն էլ վիրավորվել են։ Նրանցից մեկին հոսպիտալացրել են ծայրահեղ ծանր վիճակում, բայց վիրահատությունից հետո նրա կյանքին վտանգ չի սպառնում։ Եվս երեք հոգի թեթեւ վնասվածքներով գտնվում են հիվանդանոցում։ Ականատեսների հետ աշխատում են հոգեբանները։
«Իսլամական պետության» ահաբեկչական խմբավորումը հայտարարել է, որ հարձակումն իրականացրել է իրենց զինվորներից մեկը։
