Դերասանուհի Գոլշիֆթե Ֆարահանին պատմել է, թե ինչու նա որոշել նկարահանվել քուրդ կանանց մասին «Արեւի աղջիկները» ֆիլմում, որոնք պայքարում են իրենց ազատության համար, հաղորդում է «ՌԻԱ Նովոստի»-ն:
Ժապավենը նկարահանվել է երեք կին ռեժիսորներից մեկի՝ ֆրանսուհի Եվա Հուսսոնի կողմից, որի կինոնկարը մասնակցում է Կաննի կինոփառատոնի հիմնական մրցույթի:
«Ինձ համար սա կանանց պատմություն է, որոնք պահանջում են ազատ արձակել իրենց եւ խնդրում են իրենց հնարավորություն տալ ինքնուրույն որոշելու իրենց համար՝ էլ չասած այն մասին, որ նրանց բռնաբարել եւ խոշտանգումների են ենթարկել»,- կիրակի օրը լրագրողների հետ զրույցում ասել է Ֆարահանին:
«Ես կարծում եմ, որ եթե մենք բոլորս նայեինք մեր մայրերին ու տատիկներին, մենք կհասկանայինք, որ նրանցից յուրաքանչյուրը բախվել է անարդարության հետ: Ես մտածեցի, թե ինչ եմ ես ուզում անել, ես ուզում եմ ազատել իմ նախնիներին եւ ինձ եւ չփոխանցեմ այդ ցավը իմ դստերը, որպեսզի մենք վերջապես կարողանանք ապրել ազատ տղամարդկանց եւ կանանց աշխարհում՝ ազատ տգիտությունից», - ընդգծել է դերասանուհին:
«Սա քուրդ կանանց պատմություն է, որոնց գերեւարել էին, սակայն նրանց հաջողվել է փախչել: Նրանք զինվորներ են դարձել, եւ այս պատմությունն ինձ անհավանական թվաց: Նրանք անմարդկային ուժ են ցուցաբերել եւ հրաժարվել են զոհ լինել: Նրանք պաշտպանել են իրենց պատիվը: Նրանց համար պայքարն ինքնին հաղթանակ էր»,- նշել է ֆիլմի ռեժիսոր Եվա Հուսսոնը:
