Տնտեսական հարաբերությունները չեն արտահայտում այն մթնոլորտը, որ կա Հայաստան-Իրան հարաբերություններում եւ մենք այստեղ մեծ անելիքներ ունենք։ «Ազատություն» ռադիոկայանի փոխանցմամբ, այս մասին այսօր՝ մայիսի 13-ին, ասել է վարչապետ Նիկոլ Փաշինյանը։
«Մենք ունենք նախագծեր, որ չգիտես ինչու չեն իրագործվում, մենք ունենք նախագծեր, որոնք դանդաղ են իրագործվում, մենք ունենք նախագծեր, որոնք իրագործվում են ոչ այն ծավալով, որով կարող են իրագործվել։ Մեր խնդիրն է էականորեն ակտիվացնել Իրանի հետ տնտեսական հարաբերությունները, որովհետեւ կարծում եմ, որ այդ հարաբերությունների զարգացումը բխում է թե Իրանի, թե Հայաստանի շահերից»,-ասել է նա։
Վարչապետը նշել է, որ ինքը համագործակցության հանրավորություն է տեսնում տարբեր ոլորտներում․ «Մենք տեսնում ենք համագործակցության հնարավորության ընդլայնում ռազմատեխնիկական համագործակցության ասպարեզում, էներգետիկայի, տուրիզմի աասպարեզում եւ մենք հույս ունենք, որ իրանական ներդրումներ կգան Հայաստան եւ մենք մտադիր ենք լրջորեն ուսումնասիրել եւ վերացնել ներդրումների այսիսի հոսքի համար առկա բոլոր խոչընդոտները։ Մենք հույս ունենք էականորեն մեծացնել գյուղմթերքի մասնավորապես մսի արտահանումը դեպի Իրանի Իսլամական հանրպետություն։ Կարճ ասած շատ մեծ էներգիա ունենք հայ-իրանական հարաբերություններին նոր շունչ տալու, եւ հույս ունենք, որ այդ էներգիան եւ մղումը բարյացակամորեն կընդունվի Իրանի բարեկամական ժողովրդի եւ պետության կողմից»։
Հարցին, թե գազի տրանսֆերի համար շատ են մեղադրում, Ռուսաստանին եւ այս առումով, վարչապետը ինչ դիրքորոշում ունի, Նիկոլ Փաշինյանը պատասխանեց․ «Չեմ կարծում, թե գազի տրանսֆերի համար պետք է մեղադրել Ռուսաստանին, որովհետեւ դա Հայաստան-Իրան հարաբերությունների հարց է եւ ճիշտ չի լինի մեր հարաբերությունների որեւէ դրվագի համար մեղադրել երրորդ կողմերին, եթե մենք ունենք կամք, որեւէ խնդիր լուծելու, մենք այդ խնդիրը կլուծենք»։