Պաղեստինյան ազգային վարչակազմը ԱՄՆ դեսպանատան՝ Թել-Ավիվից Երուսաղեմ տեղափոխման կապակցությամբ հետ է կանչել իր դեսպաններին եվրոպական 4 երկրից՝ Ռումինիայից, Չեխիայից, Հունգարիայից եւ Ավստրիայից, հայտարարել է Պաղեստինի ԱԳՆ-ն, փոխանցում է «ՌԻԱ Նովոստի»-ն:
Երուսաղեմում ԱՄՆ դեսպանատան բացման արարողությունը տեղի է ունեցել երկուշաբթի օրը, մեկ օր առաջ Իսրայելի արտաքին գործերի նախարարությունում տեղի էր ունեցել մի քանի երկրների՝ Ռումինիայի, Չեխիայի, Հունգարիայի եւ Ավստրիայի դեսպանների ընդունելությունը:
Պաղեստինի ԱԳՆ-ն նշում է, որ դեսպանների գործողությունները միջազգային իրավունքի եւ ՄԱԿ-ի՝ Երուսաղեմի կարգավիճակի վերաբերյալ բանաձեւերի կոպիտ խախտում է համարում: Ընդ որում, Պաղեստինի արտաքին գործերի նախարարությունը շեշտում է, որ «բարձր է գնահատում Եվրամիության երկրների մեծ մասի դիրքորոշումը պաղեստինյան խնդրի վերաբերյալ»:
Հիշեցնենք, որ երեքշաբթի օրը Պաղեստինի ԱԳՆ-ն ի պատասխան ԱՄՆ դեսպանատան տեղափոխմանը Երուսաղեմ հետ էր կանչել իր հյուպատոսին Վաշինգտոնից: