Հայաստանում քաղաքական ճգնաժամի խաղաղ կարգավորումը սահմանադրական գործընթացների միջոցով եւ տնտեսական ինստիտուտների անխափան աշխատանքը, ինչպիսին Կենտրոնական բանկն է, նվազեցրել է ճգնաժամի ազդեցությունը տնտեսության վրա։ Այս մասին նշված է Fitch Ratings վարկանիշային գործակալության տարածած հայտարարությունում։
Ֆինանսական սեկտորում չի նկատվել բանկային իրացվելիության կամ դեպոզիտի վրա ապակայունացնող ճնշում, միաժամանակ միջազգային պահուստները տրամաբանական մակարդակում են մնացել։ Ապրանքների գների, արտահանման պահանջարկի եւ դրամական փոխանցումների շարունակական աճի տեսանկյունից բարենպաստ արտաքին միջավայրը նվազեցրել է տնտեսության կարճաժամկետ ռիսկերը: ՀՆԱ–ի իրական աճը 2017 թվականին կազմել է 7.5 տոկոս, իսկ տնտեսական ակտիվության ցուցանիշը 2018 թվականի առաջին եռամսյակում միջինում աճել է 10.6 տոկոսով։
Նոր կառավարության առումով, գործակալությունում ենթադրում են, որ որոշակի գործոններ ցույց են տալիս մակրոտնտեսական եւ ֆինանսական կայունության, ինչպես նաեւ ֆիսկալ հաշվի կայունության պահպանման միտման լայն շարունակականություն։
Այս առումով, երբ նոր վարչապետը հայտարարում է բազմավեկտոր արտաքին քաղաքականության մասին, Fitch գործակալությունը նշում է, որ միջազգային լարվածության ռիսկերի կրճատումը անխափան տնտեսական եւ արտաքին քաղաքականության համադրությամբ ենթադրում է, որ տեխնիկական եւ ֆինանսական աջակցությունը միջազգային ֆինանսական հաստատությունների եւ երկկողմ գործընկերների կողմից, ըստ ամենայնի, հասանելի կմնան։
Ամփոփելով գործակալությունը նշում է, որ նրանք ակնկալում են ղարաբաղյան հակամարտության կարգավորման շուտափույթ առաջընթաց եւ գտնում են, որ լարվածության վտանգ կա՝ կապված վերջին երկու տարվա բազում բախումների հետ։
