Կատալոնիայի ժեներալիտետի նոր ղեկավար Կիմ Տորան անտեսել է Իսպանիայի վարչապետ Մարիանո Ռախոյի նախազգուշացումը եւ կառավարությունում ներառել է երկու ձերբակալված քաղաքական գործիչների եւ եւս երկուսի, որոնք արտասահման են փախել, հաղորդում է El Pais-ը:
Ժոսեպ Ռուլը եւ Ժորդի Տուրուլը, որոնք կալանավորված են, համապատասխանաբար ստացել են տարածքների եւ նախագահության նախարարների պաշտոնները:
Լլուիս Փուջը, ով Բրյուսելում է գտնվում այն բանից հետո, երբ Բելգիայի իշխանությունները հրաժարվեցին նրան Իսպանիային արտահանձնել, պետք է մշակույթի նախարարի պաշտոնը զբաղեցնի: Տոնի Կոմինը, ով նույնպես արտասահմանում է, առողջապահության նախարար է նշանակվել: