Ուշ թե շուտ Արցախը պետք է մասնակցի բանակցություններին եւ այդ մասին խոսել են նույնիսկ ԵԱՀԿ Մինսկի խմբի համանախագահները:: Այս մասին, այսօր՝ մայիսի 22-ին, ԱԺ-ում լրագրողների հետ զրույցում նշեց ԱԳ փոխնախարար Շավարշ Քոչարյանը:
Նրա խոսքով, եթե Կազանի հանդիպումը հաջողությամբ ավարտվեր, ապա Արցախն էլ պարտադիր պետք է տար իր հավանությունը փաստաթղթին եւ երեքը միասին աշխատեին խաղաղության պայմանագրի վրա:
«Ակնհայտ է, որ առանց հակամարտության հիմնական կողմի՝ Արցախի, ավելին, քանի որ սեղանի վրա դրված հարցերի մեծամասնությունը վերաբերում է Արցախին, առանց նրա մասնակցության անհնարին է դրանց լուծումը: Չմասնակցությունը պայմանավորված է Ադրբեջանի դիմադրությամբ: Մյուս կողմից համանախագահները լավ գիտեն, որ Հայաստանը չի կարող բանակցել Արցախի փոխարեն եւ այն պահից, որ հնարավոր լինի առաջընթաց արձանագրել, այդ պահից Արցախը կմասնակցի»,-հայտարարեց փոխնախարարը:
Նրա համոզմամբ, Արցախի մասնակցություն-չմասնակցությունը լակմուսի թղթի պես ցույց է տալիս, թե արդյոք Ադրբեջանը իրոք ձգտում է որեւէ առաջընթացի, թե այդ գործընթացն օգտագործում է որպես քող՝ իր ապակառուցողական քաղաքականությունը շարունակելու համար:
Շավարշ Քոչարյանը նշեց, որ 1994-ին ռազմական գործողությունների դադարեցման եռակողմ համաձայնագիրը միակ փաստաթուղթն է, որը ժողովուրդն իր վրա զգաց արդյունքը. «Դա ստեղծվեց երկկողմ բանակցություններով՝ Ստեփանակերտի եւ Բաքվի միջեւ, եւ երբ փաստաթուղթը պատրաստ էր, նոր միացավ Հայաստանը»:
