Թուրքիայի խորհրդարանի խոսնակ Մեհմեդ Ալի Սահինը Կանադայի իշխանություններին կոչ է արել փոխել Հայոց ցեղասպանության հանդեպ իրենց վերաբերմունքը եւ ապրիլին՝ Ցեղասպանության հերթական տարելիցի նախաշեմին այս հարցի վերաբերյալ նոր բանաձեւ չընդունել։
«Մենք չենք ցանկանում ապրիլին նոր խնդիրների առաջ կանգնել»,- հայտարարել է Սահինը իր կանադացի գործընկեր Նոել Քինսելայի հետ համատեղ մամուլի ասուլիսի ժամանակ, գրում է թուրքական Hurriyet Daily News-ը։
«1915 թվականի իրադարձությունները պետք է գնահատվեն օբյեկտիվորեն եւ գիտական տեսանկյունից։ Ստորագրված հայ-թուրքական արձանագրությունները հենց այդ նպատակն էին հետապնդում»,- ասել է նա։
Ընդգծելով, որ Կանադայում 50 հազար թուրք է ապրում՝ Սիհանը հավատացրել է, որ նրանք քաղաքակիրթ մարդիկ են, ովքեր իրենց ներդրումն ունեն Կանադայի կայունության եւ զարգացման մեջ:
«Ուզում եմ հավատալ, որ Կանադայի կառավարությունը եւ երկրի իշխանությունները չեն ձեռնարկի քայլեր, որոնք կնեղացնեն Թուրքիայի քաղաքացիներին»,- ասել է նա։
Սակայն Քինսելան իմացել է ինչ պատասխանել Թուրքիայի այս կոչերին։ Նա հայտարարել է, որ պետք էր դասեր քաղել պատմությունից, որպեսզի չնեղացնես ուրիշներին:
1996 թվականի ապրիլի 23-ին՝ Հայոց ցեղասպանության 81-րդ տարելիցին,Կանադայի խորհրդարանն ընդունել էր Հայոց ցեղասպանությունը դատապարտող բանաձեւ։ 2004 թվականի ապրիլին Կանադայի խորհրդարանի հանրային պալատը ճանաչել էր Օսմանյան Թուրքիայում 1915 թվականին իրականացված Ցեղասպանությունը։
