Հունիսի 1-ից ուժի մեջ է մտնում Հայաստան-ԵՄ նոր համաձայնագիրը, որը կարգավորվելու է անցումային դրույթներով: Այս մասին, այսօր՝ մայիսի 25-ին, լրագրողների հետ զրույցում նշեց ԱԺ արտաքին հարաբերությունների մշտական հանձնաժողովի նախագահ, ՀՀԿ խմբակցության պատգամավոր Արմեն Աշոտյանը:
Մենք ակնկալելու ենք, որ ԵՄ-ն լիարժեք վավերացնի համաձայնագիրը, ոչ միայն այն պատճառով, որ մնացյալ 20 տոկոսը կարող ենք իրագործել բացառապես Եվրախորհրդարանի կողմից վավերացնելուց հետո, այլ այն պատճառով, որ այդ համաձայնագրում ներառված քաղաքական ձեւակերպումները, մասնավորապես Արցախի խնդրին վերաբերող, ստանան իրավական լիարժեք ուժ, չմնան միայն որպես ձեւակերպումներ»,-ընդգծեց նա:
Աշոտյանը հորդորեց նոր կառավարությանը ներառել Հայաստան-ԵՄ համաձայնագրի հիմնական ուղղությունները կառավարության ծրագրի մեջ, որպեսզի այն համահունչ լինի ԵՄ առջև ստանձնած պարտավորությունների հետ: «Սա լավ լուծում կարող է լինել բոլորիս համար, որովհետեւ ակնհայտ է, որ Հայաստան-ԵՄ հարաբերությունները ունեն նաեւ տնտեսական ու բարեփոխումային հարթությունները: Կոնկրետ քայլեր են ակնկալվում գերատեսչություններից: Քաղաքական գործիչները կարող են անել հայտարարություններ, բայց ամեն նախարարություն պետք է ունենա իր ծրագիրը: Այս ավանդույթը ժամանակին դրված է, ստեղծված էր միջգերատեսչական խումբ, կարծում եմ, որ սա հրաշալի հնարավորություն է երկրում արագացնել բարեփոխումների պրոցեսը»,- ասաց ՀՀԿ-ական պատգամավորը:
Հարցին, թե արդյոք անհանգստություն չունե՞ն, որ նոր կառավարությունը կարևորություն չի տա այս փաստաթղթին, Արմեն Աշոտյանը պատասխանեց. «Կարծում եմ, որ չի կարելի աչքաթող անել ԵՄ-ի հետ մեր ստանձնած պարտավորությունների կատարումը: Կա պարտավորությունների ժամկետ՝ հունիսի 1, որից ուշանալը դրական չի ազդի մեր երկրում տեղի ունեցող բարեփոխումների վրա: Ես ակնկալում եմ կոնկրետ քայլեր»: