Երեւանի ընդհանուր իրավաության դատարանի Ավան եւ Նոր Նորքի նստավայրում այսօր՝ մայիսի 31-ին «Սասնա ծռեր»-ի գործով ամբաստանյալ Խաչատուր Գիչյանի խափանման միջոցը փոխելու միջնորդություն ներկայացվեց։

Պաշտպան Մարինե Ֆարմանյանը դատարանին ներկայացրեց Գիչյանի դատաբժշկական փորձանքննության արդյունքները, որի համաձայն Գիչյանն ունի մի շարք հիվանդություններ, դրանց թվում՝ սրտի էշեմիկ հիվանդություն, զարկերակային հիպերտոնիա, միզաքարային հիվանդություններ, որոնց բուժում պետք է անհապաղ սկսել։ Ներկայացված հիվանդությունների հիմքով պաշտպանը ներկայացրեց խափանման միջոցը փոխելու միջնորդությունը, որպեսզի Գիչյանը պատշաճ բուժում կարողանա ստանալ։

Գործող դատախազը միջնորդության տեքստին 15 րոպե ծանոթանալուց հետո հայտարարեց, որ իրենք մասնակի են առարկում միջնորդությանը եւ հաշվի առնելով Գիչյանի տարիքն ու սոցիալական վիճակը, կարծում է, որ խափանման միջոցը պետք է փոխել ստորագրությամբ չհեռանալու մասին։ Դատավոր Արտուշ Գաբրիելյանը գնաց խորհրդակցական սենյակ, վճիռը կհրապարակվի 15 րոպեից։