Ցանկացած նախարար, որ նշանակվել է, պետք է իրականացնի կառավարության ծրագիրը, որեւէ նախարար իրավասու չէ իրականացնելու իր կուսակցության քաղաքական ծրագիրը: Այս մասին, այսօր՝ մայիսի 31-ին, ԱԺ-ում լրագրողների հետ զրույցում նշեց «Ծառուկյան» խմբակցության պատգամավոր Սերգեյ Բագրատյանը:
Նրա խոսքով, երբ ընտրություններ լինեն եւ ձեւավորվի ժողովրդի հստակ քվեն, այդ ժամանակ եթե կոալիցիա լինի, արդեն քաղաքական ուժերը պատասխանատվություն պետք է կրեն:
«Այսինքն եթե որեւէ կուսակցություն իր ծրագրում նշել է հստակ գործողություն, ընտրություններից հետո այդ ուժի նախարարն իրավունք կստանա դա իրականացնելու: Իսկ այս պահին հիմնական պատասխանատուն մնում է գործող վարչապետն ու իր թիմը: Այն քաղաքական ուժերին, որոնք նախարարի տեղեր են ստացել կառավարությունում, նրանց չի տրվել իրավունք իրականացնելու իրենց քաղաքական կուրսը: Այս պահին մեր ծրագրերը կառավարության ծրագրում դեռ չկան»,-հայտարարեց «Ծառուկյան» խմբակցության պատգամավորը:
Դիտարկմանը, թե այսինքն այն, որ ԲՀԿ-ական նախարարներ կան, դա պատասխանատվություն չի՞ ենթադրում, Բագրատյանը պատասխանեց. «ԲՀԿ-ի նախարարը պատասխանատու է տվյալ ոլորտում կառավարության ծրագրի իրրականացման համար: Մենք դեռ չգիտենք, թե կառավարության ծրագրում մեր ծրագրի որ դրույթներն են ներառված լինելու: Դա կախված կլինի քաղաքական ուժերի միջեւ քննարկումների արդյունքներից»: