Եվրամիության կողմից ֆինանսավորվող «Կառուցողական երկխոսության հանձնառություն» ծրագրի շրջանակում այսօր՝ մայիսի 31-ին, դրամաշնորհների հանձնման համաձայնագիր ստորագրվեց քաղհասարակության կազմակերպությունների (ՔՀԿ) կոալիցիաների հետ: Այնուհետեւ ներկայացվեցին դրամաշնորհային ծրագրերը:
Մինչեւ 25 միլիոն դրամ ստացած ՔՀԿ կոալիցիաները ծրագրեր են իրականացնելու ծրագրի թիրախային հետեւյալ ոլորտներում՝ արդարադատություն, մարդու իրավունքներ, հանրային ֆինանսների կառավարում, կրթություն, սոցիալական ոլորտ. հաշմանդամություն ունեցող երեխաների սոցիալական ներառում, գյուղատնտեսություն, տնտեսություն, էներգետիկա:
Հայաստանում Եվրամիության պատվիրակության համագործակցության բաժնի ղեկավարի տեղակալ Գրեգորի Ցուրիսն իր ողջույնի խոսքում նշեց, որ ԵՄ-ն Հայաստանում ՔՀԿ-ների աջակցության ծրագրեր իրականացնում է 2012 թվականից ի վեր, եւ այս տարիների ընթացքում նրանց դերը փոխվել է.
«Նախկինում նրանք ընկալվում էին որպես ծառայություն մատուցողներ՝ հանրային եւ սոցիալական, ապա այժմ դիտարկվում են որպես կառավարության եւ մարդկանց միջեւ կապեր ստեղծողներ: Եվ այս ծրագիրը այս հարցերի վրա է կենտրոնացած»,- ասաց Գրեգորի Ցուրիսը եւ հավելեց, որ բավականին մեծ են սպասելիքները՝ դրամաշնորհային ծրագրերի իրականացումից:
«Հայաստանն ունի նոր կառավարություն՝ դրական եւ ամբիցիոզ ծրագրերով, եւ ՔՀԿ-ները պարտավոր են լուրջ ազդեցություն ունենալ հանրային քաղաքականությունների մասնակցությամբ՝ սկսելով երկխոսել կառավարության հետ, մոնիթորինգներ իրականացնել, հուշել առկա խնդիրների մասին եւ փոխանցել հանրությունից ստացող ազդակները»,- ասաց ծրագրի ղեկավար, Իրավաբանների հայկական ասոցիացիայի նախագահ Կարեն Զադոյանը:
