Ավստրիայի դաշնային կանցլեր Սեբաստյան Կուրցը անհրաժեշտ է համարում Եվրամիության ինստիտուտների ծախսերի կրճատումը, հայտնում է Die Welt-ը:«Ես կարծում եմ, որ եթե ցանկանում ենք Եվրոպայում տնտեսման հասնել, Բրյուսելը պետք է լավ օրինակ ծառայի եւ կրճատի իր վարչական ծախսերը»,- ասել է Կուրցը, ում երկիրը հուլիսի 1-ից կդառնա ԵՄ նախագահը:
Կուրցն առաջարկում է եվրահանձնակատարների թիվը ռոտացիոն սկզբունքի հիման վրա 28-ից կրճատել մինչեւ 18, ինչպես նաեւ հրաժարվել Եվրախորհրդարանի նիստերի անցկացման 2 վայրերից մեկից, որոնք տեղի են ունենում Բրյուսելում եւ Ստրասբուրգում: Ըստ նրա՝ դա կբերի ոչ միայն ծախսերի տնտեսման, այլեւ Եվրահանձնաժողովը կդարձնի առավել արդյունավետ եւ կենտրոնացված: Ըստ որում՝ նա նշել է, որ Էմանուել Մակրոնի օրոք Ֆրանսիան կամավոր չի հրաժարվի Ստրասբուրգից Եվրախորհրդարանի բաժանմանը:
Ավարտվող յոթամյա շրջանում ԵՄ բյուջեն կազմում է 1087 մլրդ եվրո, ըստ որում՝ 2021-2027 թվականների բյուջեի նախագծում ԵՀ-ն ցանկանում է այն հասցնել մինչեւ 1279 մլրդ եվրոյի: Բյուջեի եւ մարդկային ռեսուրսների հարցերով եվրահանձնակատար Գյունտեր Էթինգերն ավելի վաղ ընդգծել էր, որ ԵՄ-ն մեծ ջանք պետք է գործադրի ԵՄ-ից Մեծ Բրիտանիայի դուրս գալուց հետո բյուջեի ճեղքը փակելու համար: Եթե հիմա ԵՄ երկրները միության բյուջե են մուծում իրենց ՀՆԱ 1 տոկոսին համարժեք գումար, ապա հիմա այս ցուցանիշը կմեծանա մինչեւ 1,11 տոկոս:
