Եվրոպական երկրները հետագայում էլ մտադիր են շարունակել հետեւել Իրանի միջուկային ծրագրի վերաբերյալ համաձայնագրին եւ ակնկալում են, որ Թեհրանը նույնպես կհետեւի դրան: Այս մասին շաբաթ Կանադայում G7 գագաթաժողովի շրջանակում լրագրողների հետ զրույցում հայտարարել է Գերմանիայի կանցլեր Անգելա Մերկելը, հայտնում է ՏԱՍՍ-ը:
«ԱՄՆ-ի հետ տարաձայնությունները շարունակվում են, մենք՝ եվրոպացիներս, ցանկանում ենք հետեւել Իրանի հետ պայմանագրին եւ հուսով ենք, որ Իրանը հետագայում էլ կշարունակի կատարել իր պարտավորությունները», - ասել է նա:
Մերկելը նաեւ հուսով է, որ Սինգապուրում ԱՄՆ նախագահ Դոնալդ Թրամփի եւ Հյուսիսային Կորեայի առաջնորդ Կիմ Չեն Ընի առաջիկա հանդիպումը կնպաստի Կորեաական թերակղզու ապամիջուկայնացմանը:
Ըստ կանցլերի՝ G7-ին Ռուսաստանի միացումը դեռ հնարավոր չէ, դրա համար Ուկրաինայի հարցով Մինսկի համաձայնագրերի իրականացման հարցում զգալի առաջընթաց է հարկավոր: