Էրեբիլում Իրանի գլխավոր հյուպատոսությունը բողոքի նոտա է հղել Իրաքյան Քուրդիստանին՝ երկիր ներխուժած ահաբեկչական խմբավորումների կապակցությամբ, փոխանցում է «ԻՐՆԱ»-ն:
Իրանի հյուպատոսության դիվանագիտական պատվիրակությունն Իրաքյան Քուրդիստանի արտաքին հարաբերությունների վարչության ղեկավարության հետ հանդիպման ժամանակ բողոքի նոտա է հղել՝ երկրի սահմաններին ահաբեկչական խմբավորումների վերջին գործողությունների կապակցությամբ: Իրանական կողմը նաեւ հիշեցրել է, որ Իրանի զինված ուժերը օրինական ինքնապաշտպանության եւ սպառնալիքներին դիմակայելու իրավունք ունեն:
Իրաքյան Քուրդիստանի արտաքին հարաբերությունների դեպարտամենտի ներկայացուցիչ Սիհամ Մամանդն իր հերթին հայտարարել է Իրաքյան Քուրդիստանի ինքնավարության՝ Իրանի հետ հարաբերություններն ամրապնդելու եւ զարգացնելու վճռականության մասին: «Իրաքյան Քուրդիստանը թույլ չի տա, որպեսզի նման գործողություններ ճնշում գործադրեն երկու երկրների կառուցողական հարաբերությունների վրա»,- նշել է նա:
Հիշեցնենք, որ Իրանի իսլամական հեղափոխության պահապանների կորպուսի (ԻՀՊԿ) ցամաքային ուժերն ավելի վաղ հայտնել էին երկրի հյուսիս-արեւմուտքում գտնվող Օշնավիե եւ Սարվ-Աբադ քաղաքներում երկու ահաբեկչական խմբավորման ոչնչացման մասին: