Վճռաբեկ դատարանը հեռացավ խորհրդակցական սենյակ՝ Արցախի պաշտպանության բանակի նախկին հրամանատար, Արցախի հերոս Սամվել Բաբայանի գործով բողոքի վերաբերյալ որոշում կայացնելու:
Սամվել Բաբայանի պաշտպան Ավետիս Քալաշյանը Վճռաբեկ բողոք է ներկայացրել՝ պահանջելով արդարացնել իր պաշտպանյալին, ինչպես նաեւ փոխել խափանման միջոցը: Նշենք, որ Ազգային ժողովի 11 պատգամավորներ հանդես են եկել Սամվել Բաբայանի և Սանասար Գաբրիելյանի կալանքը, որպես խափանման միջոց փոխելու անձնական երաշխավորությամբ: Այսօրվա նիստին ներկա են երաշխավորած պատգամավորներից Նաիրա Զոհրաբյանն ու Վահե Էնֆիաջյանը:
Հիշեցնենք, որ առաջին ատյանի դատարանը Սամվել Բաբայանին մեղավոր էր ճանաչել Քրեական օրենսգրքի 38-235-րդ հոդվածի 2-րդ մասով (մի խումբ անձանց կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) եւ 190-րդ հոդվածի 1-ին մասով (Հանցավոր ճանապարհով ստացված գույքն օրինականացնելը (փողերի լվացում) եւ դատապարտել 6 տարվա ազատազրկման։ Վերաքննիչը անփոփոխ էր թողել առաջին ատյանի որոշումը:
