Ինչպես հայկական կողմը, այնպես էլ միջազգային գործընկերները հոգնել են ադրբեջանական լրատվամիջոցների ապատեղեկատվությունը հերքելուց: Այս մասին հունիսի 18-ին ճեպազրույցի ժամանակ ասաց ԱԳՆ մամուլի քարտուղար Տիգրան Բալայանը՝ պատասխանելով իսրայելցի նախարար Ցախի Խանեգբիին վերագրվող հակահայկական հայտարարությունների վերաբերյալ հարցին:
«Այս փաստի վերաբերյալ մենք կապ ենք հաստատել իսրայելական կողմի հետ: Ամենաբարձր մակարդակով հավաստիացրել են, որ նման բան չի ասվել եւ չէր կարող: Սա հաղորդագրություն է «սահմանին 11 հազար հա» շարքից»,- նշեց Տիգրան Բալայանը՝ նկատի ունենալով ադրբեջանական կողմի տարածած ապատեղեկատվությունը Նախիջեւանի ուղղությամբ նշված տարածքի գրավման մասին:
Ի պատասխան բանակցային գործընթացին Արցախի մասնակցության մասին հարցին՝ Բալայանը նշեց, որ չի կարող որեւէ բան ավելացնել արդեն հրապարակված պաշտոնական հայտարարություններին: «Մեր առաջնահերթությունն է Արցախի անվտանգությունը»,- շեշտեց նա:
