Հնարավոր է՝ ԱՄՆ-ն հրաժարվի Human Rights Watch միջազգային իրավապաշտպան կազմակերպության եւ այլ խմբերի հետ աշխատելուց, որոնք չեն աջակցել ՄԱԿ Մարդու իրավունքների հարցերով խորհրդում Վաշինգթոնի առաջարկած բարեփոխմանը: ՄԱԿ-ում ԱՄՆ մշտական ներկայացուցիչ Նիկի Հեյլին համապատասխան նամակն ուղարկել է HRW, փոխանցում է «ՌԻԱ Նովոստի»-ն:
«Դուք պետք է իմանաք, որ բանակցություններին (ՄԱԿ ՄԻԽ բարեփոխման շուրջ) ընթացք չտալու եւ բարեփոխմանը խոչընդոտելու ձեր ջանքերը Խորհրդից ԱՄՆ-ի դուրս գալու պատճառներից մեկն է»,- նշված է նամակում:
Հեյլին շեշտել է, որ մեկ տարի առաջ ԱՄՆ-ն հայտնել էր ՄԻԽ բարեփոխման հիմնական ուղղությունները՝ «Խորհրդի կազմի որակի բարելավում» եւ «հակաիսրայելական կողմնակալ օրակարգից» հրաժարում: Անցյալ ամիս ԱՄՆ-ն փոքր թվով երկրների շրջանում «ՄԻԽ ամրապնդման մասին» բանաձեւի նախագիծ էր տարածել ուսումնասիրելու համար: «Այս պահին մենք ոչ մի պետությունից որեւէ գրավոր ուղղում չենք ստացել: Միակ գրված փաստաթուղթը Ռուսաստանի եւ Չինաստանի դեմարշներն էին, ինչպես նաեւ ձեր համատեղ նամակը, որով դիմում եք անդամ երկրներին միեւնույն խնդրանքով՝ հանդես գալ մեր բանաձեւի դեմ եւ չմիանալ տեքստի աշխատանքին»,- նշել է Հեյլին:
Նրա խոսքով՝ HRW-ն, այսպիսով, «մարդու իրավունքների հարցում Ռուսաստանի եւ Չինաստանի կողմում է ընդդեմ ԱՄՆ-ի»:
«ԱՄՆ-ն շարունակում է մնալ բոլոր մարդկանց իրավունքների համար պայքարի եւ զանգվածային հանցագործությունների նկատմամբ միջազգային հանրության ուշադրությունը գրավող առաջնորդը: Մենք ուրախ կլինենք աշխատելու հասարակական կազմակերպությունների հետ, որոնք համաձայն են այս նպատակներին, բայց ոչ այն կազմակերպությունների հետ, որոնք դրանք խափանում են»,- եզրափակել է ՄԱԿ-ում ԱՄՆ մշտական ներկայացուցիչը:
