Իրանի միջուկային գործունեությունը միշտ խաղաղ է եղել, հայտնել է երկրի նախագահ Հասան Ռոհանին ՝ ՄԱԳԱՏԷ-ի գլխավոր տնօրեն Յուկիա Ամանոյի հետ Վիեննայում հանդիպման ժամանակ, փոխանցում է Mehr-ը։

Նրա խոսքով՝ եթե իրանական միջուկային համաձայնագրի շրջանակում իրանցի ժողովրդի իրավունքները չպահպանվեն, ապա համաձայնագրում մնալու պատճառներ չեն լինի։ Ռոհանին նշել է , որ իրանական միջուկային համաձայնագիրը մեծ հաջողություն էր դիվանագիտության ու ՄԱԳԱՏԷ-ի համար, ու այդ հաջողության պահպանումը կախված է բոլոր կողմերի պարտավորությունների հավասարակշռությունից։

Խոսելով համաձայնագրից ԱՄՆ-ի դուրս գալու մասին՝ Ռոհանին նշել է, որ ստեղծված իրավիճակում մյուս ստորագրած կողմերը պատասխանատու են այդ քայլին հակազդելու ու պարտավորությունների դիսբալանսը փոխհատուցելու համար։

Ամանոն  իր կողմից նշել է, որ այդ համաձայնագիրը հոյակապ տեխնիկական ու դիվանագիտական ձեռքբերում է, ու ՄԱԳԱՏԷ-ն բազմիցս հաստատել է, որ Իրանը ամբողջովին կատարել է գործարքի մասով իր պարտավորությունները։ Նա նաեւ բարձր է գնահատել Իրանի զսպվածությունը պայմանագրից ԱՄՆ-ի դուրս գալուց հետո։