ԱՄՆ ներքին անվտանգության նախարար Քիրսթեն Նիլսենը երեքշաբթի հայտարարել է, որ իր երկիրը պայքարում է Կենտրոնական Ամերիկայի երկրների անօրինական միգրանտների փոխադրմամբ զբաղվող հանցավոր կազմակերպությունների դեմ, փոխանցում է «ՌԻԱ Նովոստի»–ն։
Նա նաեւ խոստացել է շարունակել աշխատանքը ԱՄՆ–ում միգրանտների ընտանիքների վերամիավորման շուրջ։ Նիլսենը միեւնույն ժամանակ նկատել է, որ անօրինական միգրանտները պետք է որքան հնարավոր է շուտ հայրենադարձվեն։
Հիշեցնենք, որ ապրիլին հայտարարված «զրոյական հանդուրժողականություն» քաղաքականության պատճառով ամերիկյան իշխանությունները ձերբակալում են սահմանն անօրինական կերպով հատող ընտանիքներին, որից հետո ծնողներին ուղարկում էին մեկուսարաններ, իսկ երեխաներին հատուկ կենտրոններ, քանի որ երեխաները քրեական պատասխանատվության ենթակա չեն։
Ավելի ուշ ԱՄՆ նախագահ Դոնալդ Թրամփը հրամանագիր է ստորագրել, որով դադարեցվում է անօրինական միգրանտների ընտանիքների բաժանման պրակտիկան։ Հունիսի վերջին Քալիֆորնիա նահանգի դաշնային դատարանը վճռել է 14 օրվա ընթացքում ընտանիքների հետ վերամիավորել մինչեւ 5 տարեկան երեխաներին եւ 30 օրում՝ 5-ից բարձր տարիքի երեխաներին։
