Սաուդյան Արաբիան Պարսից ծոցի իր նավթահանքերի ջրային տարածքներ իրանական նավերի ներխուժման կապակցությամբ դիմել է ՄԱԿ-ին, հաղորդում է «Վեստի»-ն՝ վկայակոչելով էմիրական WAM լրատվական գործակալությունը: Գործակալության տվյալներով՝ իրանական նավերը եւ մոտորանավերը բազմիցս «ներխուժել են» Սաուդյան Արաբիայի տարածքային ջրերում նավթի հանքավայրերի եւ նավթային հարթակների փակ տարածքներ: Ընդ որում, չի հաղորդվում՝ այդ նավերը ռազմական են, թե քաղաքացիական:
Միավորված ազգերի կազմակերպությունում Սաուդյան Արաբիայի մշտական ներկայացուցիչ Աբդուլլահ ալ-Մուալիմին հայտարարել է, որ, չնայած Թեհրանի եւ ՄԱԿ-ի գլխավոր քարտուղարի դեմ ուղղված նախորդ բողոքի նոտաներին, խախտումների թիվն ավելացել է, ինչը Էր-Ռիյադին ստիպել է «անհրաժեշտ միջոցներ ձեռնարկել՝ թագավորությունում գործող կանոնների համաձայն»:
Պարսից ծոցում ծովային սահմանը սահմանելիս Սաուդյան Արաբիան հղում է կատարում 1968 թվականին շահական Իրանի հետ կնքված համաձայնությանը: