Բոլոր այն կուսակցությունները, որոնք կմիանան ԲՀԿ-ին, իրենց հետագայում վատ չեն զգա։ Այս մասին լրագրողների հետ հանդիպման ժամանակ հունվարի 29-ին հայտարարեց ԱԺ ԲՀԿ խմբակցության անդամ Վարդան Բոստանջյանը։ Նրան չի անհանգստացնում այն հանգամանքը, որ ԲՀԿ-ին միանալով, լուծարված կուսակցությունները նպատակ ունեն իրենց տեղն ապահովել խորհրդարանում։ «Խորհրդարանը այնպիսի տեղ չէ, որ բոլոր քաղաքական կուսակցությունները հանգրվանեն այդտեղ, քանի որ նիստերի դահլիճում ընդամենը 131 մարդ է տեղավորվում։ Բնականաբար, փոքր քաղաքական խմբավորումները, միանալով մեծ կուսակցություններին, նպատակ ունեն իրենց մեկ-երկու տեղը ունենալ խորհրդարանում»,- հայտարարեց Բոստանջյանը։
Նա միաժամանակ ողջունեց «Երիտասարդական կուսակցության»՝ ԲՀԿ-ին միանալու որոշումը, քանի որ այսպիսով ստվարանում են քաղաքական այդ ուժի շարքերը։
Նշենք, որ օրեր առաջ ԲՀԿ-ին միացավ Հայաստանի առաջադիմական կուսակցությունը՝ Տիգրան Ուրիխանյանի գլխավորությամբ։
