Ազգային ժողովում Ընտրական օրենսգրքի փոփոխությունների հարցով ԱԺ 4 ուժերի ներկայացուցիչներից կազմված աշխատանքային խմբի այսօրվա՝ հուլիսի 20-ի նիստին ՀՀԿ խմբակցության պատգամավոր, ԱԺ փոխխոսնակ Արփինե Հովհաննիսյանը չի մասնակցում, արձակուրդում է։ Այս մասին նիստը բացելիս հայտարարեց «Ելք» խմբակցության պատգամավոր Էդմոն Մարուքյանը։
«Երեկ ամբողջ մամուլը եւ սոցիալական ցանցերը մեր հանձնաժողովի նիստի վերաբերյալ գրառումներով էին ողողված, լավ կլիներ տիկին Հովհաննիսյանը այստեղ լիներ եւ մեկնաբաներ իր կողմից ասվածը։ Ես կարծում եմ՝ մեզ աշխատանքային մթնոլորտ է պետք»,–նկատեց Մարուքյանը՝ մեկնաբանելով միջադեպը, երբ խորհրդարանական քննարկման ժամանակ ԱԺ փոխնախագահ Արփինե Հովհաննիսյանն Դանիել Իոաննիսյանին մտավոր հետամնաց է անվանել։
Նա շեշտեց, որ պետք է զերծ մնալ նմանատիպ հայտարարություններից, մոտեցումներից, որը հանձնաժողովի գործունեությանը որեւէ կերպ չի օգնի։
Ավելի ուշ Արփինե Հովհաննիսյանը Facebook-ում արձագանքել է գրառմանը եւ ներողություն խնդրել. «Խոսքերս իրականում վերաբերում էին քննարկման ընթացքում ստեղծված անհասկանալի իրավիճակին (պարզ չէր՝ ի վերջո ինչի մասին է քննարկումը), եւ որը իրականում հիշեցնում էր նկարագրածս երեւույթը (գուցե անհաջող եմ ձեւակերպել)։ Եթե հասկացվել է անձնավորված, ցավում եմ եւ բնականաբար հայցում ներողամտություն։ Ավելորդ լարվածություն ստեղծելու կարիք չկա։ Այո, համարել եմ ու համարում եմ, որ Դանիելի հետ լավ հարաբերություններ ունենք»,-գրել է նա:
