Դուք ասում եք վարչապետի եւ նախագահի լրազորությունների բալանսավորման մասին, իսկ ո՞վ է ասում, որ բալանսավորումը պետք է լինի դրանց միջեւ, եւ բալանսավորումը չի կարող տեղի ունենալ վարչապետի եւ նախահի միջեւ։ Այդ մասին այսօր՝ հուլիսի 20–ին, ասաց վարչապետ Նիկոլ Փաշինյանը՝ պատասխանելով դիտարկմանը, որ Փաշինյանը կրում է սուպերվարչապետական պատմուճանը, որը պատրաստվել էր Սերժ Սարգյսանի հագով, արդյոք հարմարավետ է զգում իրեն դրա մեջ եւ չի ցանկանում դրանցից հրաժարվել եւ բալանսավորել վարչապետի եւ նախագահի լիազորությունները։
«Սազո՞ւմ է»,– հարցին հարցով կատակեց վարչապետը։
«Օրինակ, դուք գիտեք՝ ո՞վ է Գերմանիայի նախագահը։ Գիտեք, շնորհավորում եմ ձեզ այդ կապակցությամբ, որովհետեւ շատերը չգիտեն։ Պետությունը կարող է ունենալ երկու ղեկավար, ուրեմն դա այդ պետության վերջն է։ Հայաստանի Հանրապետությունում պետությունը չի կարող ունենալ երկու ղեկավար, ինչպես Գերմանիան չի կարող ունենալ երկու ղեկավար։ Հայաստանում այսօր հաստատված է խորհրդարանական համակարգ, եւ հետեւաբար, իշխանությունը,պետության պատասխանատվությունը եւ ղեկավարումը դրված է կառավարության եւ վարչապետի վրա։ Բալանսավորումը չի կարող տեղի ունենալ վարչապետի եւ նախահի միջեւ։ Բալանսավորումը պետք է տեղի ունենա օրենսդրի, գործադրի եւ դատական իշխանությունների միջեւ։ Թեեւ չեմ բացառում, որ նախագահի ինստիտուտի համար եւս մեկ–երկու արարողակարգային լիազորություններ ավելացնենք»,– ասաց Փաշինայնը։
Նա նաեւ հավելեց, որ ժամանակին ասել է, որ այս համակարգով ավելի հեշտ է իշխանափոխություն անել, քան նախորդ համակարգով. «Հիշում եմ, ներկա էին լրագրողներ, շատերն ասում էին՝ այս ինչ է.. պարզվեց, բացահայտվեց ամեն ինչ։ Համաձայն եմ, որ այդ բալանսավորումը պետք է տեղի ունենա, եւ այդ մասին արդեն հայտարարել եմ որպես վարչապետի թեկնածու, բայց ուզում եմ, որ բոլորս գիտակցենք, որ դա մի օրում տեղի չի ունենալու։ Եթե դա տեղի ունենա մի օրում, եւ տեղի ունենա այնպես, որ չապահովի պետական կառավարման համակարգի կայունությունը՝ մենք կունենանք լուրջ խնդիրներ»։