Փանիկի միջադեպը «մամուլի հերթական պղպջակն» է, եւ ոչ մի առանձնահատուկ բան տեղի չի ունեցել: Հուլիսի 23-ին մամուլի ասուլիսում այսպիսի կարծիք հայտնեց «Կովկաս ինստիտուտի տնօրեն Ալեքսանդր Իսկանդարյանը:
Ըստ նրա՝ այն, ինչ քննարկվում է ռուսական ռազմաբազայի վերաբերյալ, ավելի շուտ ներքին հայկական բանավեճ է, որը միշտ եղել է ու կլինի, եւ կապված է հայ-ռուսական հարաբերությունների կարգավորման հարցի հետ:
«Հայաստանում մարդկանց շերտեր կան՝ համացանցում, լրագրողական հանրույթում, եւ որոշ վերլուծաբաններ, որոնք այնքան էլ գոհ չեն Ռուսաստանի հետ հարաբերությունների մակարդակով: Այն, որ Ռուսաստանը Ադրբեջանին զենք է վաճառում, խնդիրներ է ստեղծում բազայի հետ եւ այլն: Եվ յուրաքանչյուր նման իրադարձություն, նույնիսկ փոքր մասշտաբի, մամուլի պղպջակ է առաջացնում»,- պարզաբանեց Իսկանդարյանը:
Հիշեցնենք, որ հուլիսի 17-ին Փանիկ գյուղի բնակիչները կրակոցների եւ պայթյունների ձայն էին լսել: Որոշ ժամանակ անց պարզվել էր, որ կրակոցների հեղինակները Գյումրիի 102-րդ ռուսական ռազմաբազայի զինծառայողներ են: 102-րդ ռուսական ռազմաբազայի հրամանատար, ռուս գնդապետ Վլադիմիր Էլկանովը ՀՀ պաշտպանության նախարար Դավիթ Տոնոյանին ներկայացրել է միջադեպի մանրամասները: Նրա խոսքով՝ հայկական կողմի հետ համաձայնեցված միջոցառումն ընդգրկվել էր 2018 թվականի բազայի ռազմական պատրաստվածության ծրագրում: Նշվել է նաեւ, որ հրամանատարությունը սահմանված կարգով տեղեկացրել է լիազորված մարմիններին: Սակայն, հաշվի առնելով, որ զորավարժությունների անցկացման վայրի ընտրության ժամանակ հաշվի չեն առնվել այն հանգամանքները, որոնք անհանգստություն են պատճառել տեղի բնակչությանը, ռուսական կողմը պաշտոնական ներողություն է հայտնել եւ հավաստիացրել է, որ այսուհետ ավելի հետեւողական կլինի բազայից դուրս անցկացվող միջոցառումների պլանավորման եւ իրազեկման հարցերում:
Իշխանությունն ինչ պետք է աներ, արել է. ներողություն են խնդրել. ԱԱԾ տնօրենը՝ Փանիկի միջադեպի մասին
