Հայկական Փանիկ գյուղում սադրանքերի մասին հայտարարություններն ինքնին արդեն սադրանք են: Այս մասին NEWS.am-ի թղթակցի հետ զրույցում ասաց Քաղաքական եւ ռազմական վերլուծության ռուսական ինստիտուտի փոխտնօրեն Ալեքսանդր Խրամչիխինը:
Ընդ որում փորձագետը նշեց, որ դրանում ոչ մի տրամաբանություն չկա:
«Ավելի քան ակնհայտ է, որ դա տվյալ զորավարժությունների ծրագրման ժամանակ թույլ տրված սխալ էր: Կկրկնվեմ, ես չեմ հասկանում սադրանքի նպատակը», - բացատրեց Խրամչիխինը, հավելելով, որ այստեղ քննարկման համար հատուկ թեմա չկա:
Միաժամանակ փորձագետը ընդգծեց, որ վաղուց նկատել է, թե որքան հզոր է Հայաստանում Ռուսաստանից առանձնանալու եւ ռուսական 102-րդ ռազմական բազայի դուրսբերմանն ուղղված արշավը, իսկ Փանիկ գյուղում սադրանքերի մասին հայտարարություններն, ըստ նրա, նույն արշավի շրջանակում են:
Նա նաեւ նշեց, որ նման միջադեպերը, որպես կանոն, կատարվում են այն վայրերում, որտեղ զինվորականների մեծ կուտակում կա եւ Հայաստանն այդ իմաստով բացառություն չէ:
«Իսկ թե, ով ում պետք է տեղյակ պահի, դա որոշվում է բազայի տեղակայման պայմանագրով: Բայց այստեղ ծագում է հարց, թե որքանով ֆունկցիոնալ կլինի բազան, եթե այն անընդհատ բոլորին տեղյակ պահի: Այսինքն, այն, շատ հավանական է, որ չի կարողանա իրականացնել իր գործառույթները», - նշեց փորձագետը, հավելելով, որ դա կհանգեցնի նրան, որ Հայաստանում տեղակայված ռուսական զորքերը փաստացի, կդադարեն մարտական ստորաբաժանում լինել:
Խրամչիխինն ընդգծեց, որ հայ-ռուսական հարաբերությունների ապակայունացման հարցում շատ են շահագրգռված ԱՄՆ-ն, Թուրքիան, Ադրբեջանը եւ Ուկրաինան:
Հիշեցնենք, որ հուլիսի 17-ին Փանիկ գյուղի բնակիչները կրակոցների եւ պայթյունների ձայն էին լսել: Որոշ ժամանակ անց պարզվել էր, որ կրակոցների հեղինակները Գյումրիի 102-րդ ռուսական ռազմաբազայի զինծառայողներ են: Հայաստանի վարչապետ Նիկոլ Փաշինյանը միջադեպը հայ-ռուսական հարաբերությունների եւ Հայաստանի ինքնիշխանության ոտնձգության դեմ սադրանք է անվանել:102-րդ ռուսական ռազմաբազայի հրամանատար, ռուս գնդապետ Վլադիմիր Էլկանովը ՀՀ պաշտպանության նախարար Դավիթ Տոնոյանին ներկայացրել է միջադեպի մանրամասները: Նրա խոսքով՝ հայկական կողմի հետ համաձայնեցված միջոցառումն ընդգրկվել էր 2018 թվականի բազայի ռազմական պատրաստվածության ծրագրում: Նշվել է նաեւ, որ հրամանատարությունը սահմանված կարգով տեղեկացրել է լիազորված մարմիններին: Սակայն, հաշվի առնելով, որ զորավարժությունների անցկացման վայրի ընտրության ժամանակ հաշվի չեն առնվել այն հանգամանքները, որոնք անհանգստություն են պատճառել տեղի բնակչությանը, ռուսական կողմը պաշտոնական ներողություն է հայտնել եւ հավաստիացրել է, որ այսուհետ ավելի հետեւողական կլինի բազայից դուրս անցկացվող միջոցառումների պլանավորման եւ իրազեկման հարցերում:
