Թուրքիան Հայաստանի հետ հարաբերությունները նորմալացնելու ցանկության նշաններ ցույց չի տալիս: Այս մասին այսօր՝ հուլիսի 31-ին, լրագրողների հետ ճեպազրույցում նշեց Հայաստանի ԱԳՆ մամուլի քարտուղար Տիգրան Բալայանը՝ անդրադառնալով Երեւանից հնչող հայտարարություններին թուրքական կողմի արձագանքին եւ թուրքական լրատվամիջոցների հրապարակումներին:
Բալայանը նշեց, որ Թուրքիայի հետ առանց նախապայմանների հարաբերությունները նորմալացնելու հարցը ներառված է կառավարության ծրագրում: Նրա խոսքով, եթե Թուրքիայի իշխանությունները համապատասխան մեսիջ հղեն, այն կքննարկվի, սակայն առայժմ հակառակն է տեղի ունենում՝ Թուրքիայի նախագահն ու ԱԳ նախարարն այցելու են Բաքու եւ այնտեղ անում լրիվ հակառակ հայտարարություններ:
«Առանց նախապայմանների հարաբերությունները նորմալացնելու պատրաստակամության ազդակներ մենք չենք տեսնում»,-ընդգծեց Տիգրան Բալայանը:
