ՀԱՊԿ ղեկավարությունը տվյալներ չունի այն մասին՝ արդյոք Հայաստանը գլխավոր քարտուղար Յուրի Խաչատուրովի հետկանչի պաշտոնական դիմում ներկայացրել է։ Այս մասին «ՌԻԱ Նովոստի»–ին հայտնել է ՀԱՊԿ գլխավոր քարտուղարի տեղակալ Վալերի Սեմերիկովը։
Պատասխանելով հարցին այն մասին, թե հայկական կողմը դիմել է ՀԱՊԿ գլխավոր քարտուղար Յուրի Խաչատուրովի հետկանչի հարցով, Սեմերիկովը հայտարարել է. «Ես պաշտոնական տեղեկություն չունեմ այն մասին, թե հայկական կողմը դիմել է գործող գլխավոր քարտուղարի հարցով ինչ–որ պաշտոնական փաստաթղթով»։
Նրա խոսքով՝ հայկական կողմից համապատասխան դիմումի դեպքում անհրաժեշտ կլինի ՀԱՊԿ անդամ երկրների հետ համաձայնեցման գործընթաց սկսել։
«Այնուհետեւ Հավաքական անվտանգության խորհուրդը որոշում կկայացնի»,–նշել է Սեմերիկովը՝ պարզաբանելով, որ այդ գործընթացի տեւողությունը կախված կլինի նրանից, թե ՀԱՊԿ անդամ երկրները ինչպես կանցկացնեն համաձայնեցման գործընթացը եւ ով կընդգրկվի դրանում։
Ավելի վաղ ՌԴ ԱԳՆ–ն հայտարարել էր, որ ՀԱՊԿ կանոնների համաձայն՝ հենց հայկական կողմը պետք է պաշտոնապես նախաձեռնի ՀԱՊԿ գլխավոր քարտուղարի պաշտոնից իր քաղաքացու հետկանչը:
