Ես հասկանում եմ, որ կա իշխանություն եւ ունի իր մոտեցումները, բայց մեր ժողովուրդը պետք է նաեւ այլ կարծիք լսի: «Երկիր Մեդիա» հեռուստաընկերության եթերում այս մասին հայտնել է «Երկրի շաբաթը» ծրագրի հատուկ թողարկմանը հյուրընկալված ՀՀ երկրորդ նախագահ Ռոբերտ Քոչարյանը:
«Ոչ ոք չի զրկել ինձ եւ մյուսներին իրավունքից՝ ունենալ այլ կարծիք եւ հնչեցնել այն: Այսօր ես դա եմ անում: Ի՞նչ են իրար խառնվել, ինչի՞ եմ խանգարում, այլ կարծիք պիտի մենք չունենա՞նք այս երկրում»,- հավելել է նա:
Ռոբերտ Քոչարյանը նաեւ կարծիք է հայտնել, որ այն, ինչ տեղի ունեցավ Հայաստանում, հեղափոխություն չէր. «Այսքան որ խոսում են՝ հեղափոխություն, հեղափոխություն... Ես չեմ համարում, որ դա եղել է հեղափոխություն, անկեղծ: Որովհետեւ որեւէ հեղափոխության դեֆինիցիայի տակ դա չի տեղավորվում: Բայց սիրում են այդ բառը, թող օգտագործեն: Իմ տպավորությամբ՝ օգտագործում են այդ բառը մեկ պատճառով. եթե կա հեղափոխություն, ուրեմն կա հակահեղափոխություն: Եվ այդ հեղափոխության ձեռքբերումները մենք պետք է պաշտպանենք հակահեղափոխականների դեմ պայքարելով»:
Նախկին նախագահը նաեւ տպավորություն է ստացել, որ փորձում են Հայաստանում քաղաքական դաշտը սեւ ու սպիտակի վերածել, եւ դա մտածված են անում:
«Եվ սա ոչ թե ռոմանտիկ հեղափոխական տրամադրություներից բխող քաղաքականություն է, ո՛չ, սա հաշվարկ է: Հաշվարկ է, որով այլ կարծիք ունեցող մարդկանց կարելի է որակել հակահեղահեղափոխական եւ հետապնդել: Հետապնդել հասարակական կարծիքով, հետապնդել այլ մեխանիզմներով: Մենք տեսնում ենք՝ ինչպես են հարձակվում: Փաստաբաններիս վրա են հարձակվում, հնարավորություն չեն տալիս նորմալ աշխատելու, ինձ են խոսքի իրավունքից զրկում: Հասկացա՞ք ինչի համար է այս ամենը»,- հայտարարել է Ռոբերտ Քոչարյանը: