![](img/news/04/68/27/default.jpg)
Հայաստանի երիտասարդական կուսակցության մոտ 100 անդամներ դեմ են ՀԵԿ-ի՝ օրերս տեղի ունեցած համագումարում կայացված որոշմանը, ըստ որի կուսակությունը լուծարվում եւ միանում «Բարգավաճ Հայաստան» կուսակցությանը: Այս մասին նրանք հայտնում են իրենց տարածած հայտարարության մեջ՝ նշելով, որ չեն պատրաստվում անդամակցել ԲՀԿ-ին: Հայտարարությանը միացած ՀԵԿ անդամներից մեկը՝ «Արցախ» մամուլի ակումբի նախագահ Արման Սարգսյանը, ով չի մասնակցել օրերս տեղի ունեցած ՀԵԿ համագումարին, NEWS.am-ի թղթակցի հետ զրույցում ասաց, որ ՀԵԿ-ի գաղափարախոսությունը չի համապատասխանում ԲՀԿ-ի գաղափարախոսությանը, դավանած արժեքներին, հետեւապես ՀԵԿ-ը չպետք է լուծարվեր եւ միանար ԲՀԿ-ին: «Մենք շատ լավ հասկանում ենք, որ ԲՀԿ-ն պատրաստվում է առաջիկա խորհրդարանական ընտրություններին եւ նրանց մարդկային ռեսուրս է պետք: Այդ պատճառով էլ որոշեցին օգտագործել ՀԵԿ-ի ռեսուրսները»,-նշեց Սարգսյանը:
Բացի այդ, «Արցախ» ակումբի նախագահի խոսքով, անընդհատ կուսակցությունը լուծարելն ու այս կամ այն կուսակցության մեջ մտնելը մեծ վնաս է հասցնում կուսակցության անդամների հեղինակությանը, քանի որ նրանց այլեւս լուրջ չեն վերաբերվում: (Ինչպես հայտնի է՝ ՀԵԿ-ը մինչ ԲՀԿ-ին միանալը արդեն մեկ անգամ հասցրել էր լուծարվել եւ միանալ ՄԻԱԿ-ին):
Հարցին, թե հնարավո՞ր է, որ ԲՀԿ-ին անդամակցելուն դեմ ՀԵԿ-ականները այլ կուսակցության միանան, Արման Սարգսյանը պատասխանեց, թե չի բացառվում եւ հավելեց, որ այդ եւ այլ բնույթի շատ հարցեր այժմ քննարկվում է իրենց կողմից: Նրա խոսքով՝ առաջիկայում հնարավոր է նաեւ ակցիա կազմակերպեն՝ բողոքելով ՀԵԿ-ի՝ ԲՀԿ-ին միանալու որոշման դեմ: Արման Սարգսայնը նաեւ նշեց, որ առաջիկայում ինքն ու իր գաղափարակից 100 ընկերները հասարակական կազմակերպություն են ստեղծելու, որի անելիքների մասին կհայտնեն առաջիկայում հրավիրվելիք մամուլի ասուլիսի ժամանակ: Նախկին ՀԵԿ-ականները այժմ զբաղված են իրենց նոր պրոյեկտի ստեղծման հետ կապված ֆինանսական հարցերը լուծելով՝ հովանավորներ են փնտրում շենք, որ ՀԵԿ-ը գլխավորում էր Վահան Բաբայանը, ով արդեն մի քանի կուսակցություն է փոխել։ Սկզբում նա «Հանրապետություն» կուսակցությունից էր, այնուհետեւ մտավ ՀԵԿ, դարձավ նրա նախագահ։ Կարճ ժամանակ անց ՀԵԿ-ը լուծարվեց եւ միացավ ՄԻԱԿ-ին, այնուհետ կրկին դուրս եկավ ՄԻԱԿ-ից եւ հունվարի 29-ին կրկնակի լուծարվելուց հետո միացավ ԲՀԿ-ին։ Օրեր առաջ էլ ԲՀԿ-ին միացավ մեկ այլ՝ Հայաստանի առաջադիմական կուսակցությունը: