Սեպտեմբերի 1-ին Ճամբարակի և Բերդավանի սահմանամերձ երկու դպրոցներում տոնական միջոցառումներին ներկա էին նաև Յունիբանկի ներկայացուցիչները: Գիտելիքի օրվան նվիրված միջոցառումներին տեղի ունեցավ Յունիբանկի աջակցությամբ ստեղծված համակարգչային դասասենյակների բացման հանդիսավոր արարողությունը:
«Դասասենյակները հիմնովին վերանորոգված, կահավորված և հագեցված են ժամանակակից տեխնիկայով՝ համակարգիչներ, ինտերակտիվ գրատախտակ, հարմարավետ դպրոցական կահույք, ծրագրային ապահովում: Մենք շատ ուրախ ենք, որ բանկի ներկայացուցիչներն անտարբեր չեն երեխաների կրթության զարգացման և որակի նկատմամբ»,- նշեց Ճամբարակի N3 դպորցի տնօրեն Կարինե Գրիգորյանը:
Յունիբանկը Ճամբարակի և Բերդավանի երկու դպրոցների բոլոր 600 աշակերտներին նաև դպրոցական պարագաների փաթեթներ նվիրեց: Աշակերտների համար ևս մեկ անակնկալ կար. բանկի ներկայացուցիչներն անցկացրեցին վիկտորինա և հաղթող երկու աշակերտներին համակարգիչներ հանձնեցին:
«Մենք շնորհակալ ենք Յունիբանկին՝ ուսումնական գործընթացին օժանդակելու համար: Երեխաների համար կարևոր է օգտվել ժամանակակից տեխնիկայի հնարավորություններից, ինչը այժմ հնարավոր է, մեր հովանավորի շնորհիվ»,- նշեց Բերդավանի միջնակարգ դպրոցի տնօրեն Արևիկ Ասատրյանը:
Սա առաջին դեպքը չէ, երբ բանկն օգնում է դպրոցներին: Կրթության բարելավման ծրագրի շրջանակում համակարգչային դասասենյակ է բացվել նաև Գյումրու դպրոցներից մեկում, մի քանի օրից էլ բանկի աջակցությամբ «Արմաթ» լաբորատորիաներ կբացվեն Արցախի երկու դպրոցներում:
«Մեր ծրագիրը երկարաժամկետ է, և դրանում արդեն ներառվել են այլ դպրոցներ, որոնք ևս ունեն համակարգչային տեխնիկայի կարիք,- նշեց Յունիբանկի վարչության նախագահ Մեսրոպ Հակոբյանը:- Դպրոցների տեխնիկական հագեցվածությունը պետք է համապատասխանի ժամանակակից պահանջներին: Մենք շարունակելու ենք աջակցել կրթական հաստատություններին, հատկապես՝ սահմանամերձ դպրոցներին»:
