Ամերիկյան Apple ընկերությունը նամակ է ուղարկել ԱՄՆ առեւտրի ներկայացուցչության գրասենյակ, որում նշել է Չինաստանի դեմ նոր մաքսատուրքերի սահմանման հնարավոր հետեւանքների մասին, որոնց մասին ավելի վաղ ասել էր ԱՄՆ նախագահ Դոնալդ Թրամփը: Այս մասին հայտնում է Bloomberg-ը:
Սեպտեմբերի 5-ով թվագրված նամակում նշվում է, որ ԱՄՆ առաջնորդի առաջարկած պատժամիջոցները կանդրադառնան Apple-ի որոշ արտադրանքի գների վրա, ինչպես նաեւ շուկայի մրցակցության վրա:
«Մաքսատուրքերի վերաբերյալ մեր մտահոգությունն այն է, որ դրանք ավելի շատ ԱՄՆ-ին կհարվածեն, եւ որ դա կբերի փոքր աճի ու ԱՄՆ-ում մրցունակության նվազման, եւ ամերկիկացի գնորդների համար բարձր գների»,- պարզաբանել են ընկերությունից:
Չինաստանի դեմ միջոցառումների ընդունման դեպքում այնպես, ինչպես հրապարակել է Թրամփը, կաճեն Apple Watch «խելացի ժամացույցների» գները, Air Pods անլար ականջակալների, սեղանի Mac mini համակարգչի, iPad-ի համար Apple pencil ստիլուսի, լիցքավորման տարբեր սարքերի, ադապտերների:
2018 թվականի երրորդ եռամսյակում, ինչպես նշում է Bloomberg-ը, Apple-ը Չինաստանում վաճառքից ստացել է 9,6 մլրդ դոլար: Սա հաշվետու տարում ընկերության ընդհանուր եկամուտի 18 տոկոսն է կազմում: