ԵՄ-ի առեւտրի հարցերով գլխավոր ներկայացուցիչ Սեսիլիա Մալմսթրոմը հանդիպել է ԱՄՆ-ի առեւտրային ներկայացուցիչ Ռոբերտ Լայթհայզերի հետ նախագահ Դոնալդ Թրամփի՝ ԵՄ-ից ներկրվող մեքենաների մաքսատուրքերի սահմանման սպառնալիքներից հրաժարվելուց հետո, հաղորդում է Reuters-ը:
Ըստ Մալմսթրոմի, սա լավ հնարավորություն է երկու ամիս առաջ ԱՄՆ նախագահ Դոնալդ Թրամփի եւ Եվրոպական հանձնաժողովի ղեկավար Ժան Կլոդ Յունկերի հանդիպման ընթացքում ձեռք բերված համաձայնությունը կատարելու համար:
Ռոբերտ Լայթհայզերը բանակցությունները կառուցողական է անվանել, հավելելով, որ հոկտեմբերին փորձագետները կհավաքվեն, որպեսզի բացահայտեն հարկային եւ այլ խոչընդոտները, որոնք կարող են վերանայվել: Նա նաեւ ավելացրել է, որ բոլոր աշխատանքները նախատեսվում է նոյեմբերին ավարտել:
«Մասնավորապես, մենք հուսով ենք, որ առեւտրում տեխնիկական արգելքները կրճատելու հարցում լավ արդյունքներ կունենանք», - ասվում է ԱՄՆ-ի առեւտրային ներկայացուցչի գրասենյակի հայտարարությունում:
Այս տարվա հուլիսին Թրամփը Յունկերի հետ հանդիպման ժամանակ հայտարարել էր, որ հրաժարվում է ԵՄ-ից ներկրվող ավտոմեքենաների հարկային տուրքերի սահմանումից:
Աշխատանքային խմբի օրակարգում, որը գլխավորում են ԱՄՆ-ի եւ ԵՄ-ի առեւտրային գերատեսչությունների ղեկավարները, ներառված է դեպի ԱՄՆ հեղուկ գազի արտահանման մեծացման հնարավորությունների որոնման հարցը:
Բացի այդ հանդիպմանը քննարկվել են ԱՀԿ-ին վերաբերող հարցերը:
«Մենք որոշել ենք մեր առաջնահերթությունները, ինչպես նաեւ մշակել ենք կարճաժամկետ եւ միջնաժամկետ հեռանկարում կոնկրետ արդյունքների հասնելու գործողությունների ծրագիր», - նշել է Մալմասթրոմը:
Նա նաեւ ասել է, որ ԵՄ-ն ձգտելու է նվազեցնել ԱՄՆ-ից մեքենաների ներկրման մաքսատուրքերը, եթե ԱՄՆ-ն նույն կերպ վարվի եվրոպական ավտոարտադրողների նկատմամբ:
Հաջորդ նման հանդիպումը նախատեսվում է սեպտեմբերի վերջին անցկացնել:
