Աժ նախագահ Աշոտ Ղուլյանը սեպտեմբերի 13-ին ընդունել է ԱՄՆ Կալիֆոռնիա նահանգի սենատոր Էնթոնի Պորտանտինոյին, Գլենդելի քաղաքապետ Զարեհ Մինասյանին եւ Գլենդել քաղաքի քարտուղար–գործակատար Արտաշես Քասախյանին:
Արցախի ԱԺ-ից NEWS.am-ին հայտնում են, որ ողջունելով հյուրերին՝ խորհրդարանի ղեկավարը կարեւորել է Կալիֆոռնիայի նահանգային խորհրդարանական եւ քաղաքային իշխանությունների հետ կապերի շարունակականությունը եւ բարձր գնահատել 2014 թվականին Կալիֆոռնիայի խորհրդարանի եւ սենատի համատեղ որոշումը՝ ի պաշտպանություն Լեռնային Ղարաբաղի Հանրապետության:
«Համոզված եմ, որ այդ հռչակագիրն ամրապնդելու լավագույն միջոցը նմանատիպ փոխադարձ այցելություններն ու իրար հետ համագործակցելու նոր ուղիների որոնումն է»,- ընդգծել է Աշոտ Ղուլյանը:
Սենատոր Էնթոնի Պորտանտինոն, շնորհակալություն հայտնելով ընդունելության համար, խորհրդարանի ղեկավարին է ներկայացրել Հայաստանում եւ Արցախում համագործակցության իրենց նախանշած ուղղությունները: Սենատորի խոսքով՝ Հայաստանում աշխատանքներն ավելի շատ կենտրոնացած կլինեն տեղեկատվական տեխնոլոգիաների ոլորտի, իսկ Արցախում՝ գյուղատնտեսության ճյուղի զարգացման ուղղությամբ: Էնթոնի Պորտանտինոն նաեւ խոսել է մարդու իրավունքների ասպարեզում եւ ոճրագործությունների կանխարգելման ուղղությամբ սենատում իր ծավալած գործունեության մասին:
Կողմերը քննարկել են արտաքին քաղաքական իրավիճակին եւ միջխորհրդարանական համագործակցությանը վերաբերող թեմաներ:
Հանդիպմանը մասնակցում էին ԱԺ արտաքին հարաբերությունների մշտական հանձնաժողովի նախագահ Արզիկ Մխիթարյանը, նույն հանձնաժողովի նախագահի տեղակալ Դավիթ Մելքումյանը, Արտաքին գործերի նախարարի տեղակալ Արմինե Ալեքսանյանը եւ ԱՄՆ-ում Արցախի Հանրապետության մշտական ներկայացուցիչ Ռոբերտ Ավետիսյանը:
