«Ասում են՝ անձեռնմխելի է Ռոբերտ Քոչարյանը, ի՞նչ է նշանակում՝ անձեռնմխելի է. այսինքն կարելի է դնել մարդկանց սպանությունը կազմակերպել, ասել՝ ես անձեռնմխելի՞ եմ: Էդ որտե՞ղ է տենց գրած»: Այս մասին սեպտեմբերի 14-ին Փարիզում Ֆրանսիայի հայ համայնքի հետ հանդիպմանն ասել է ՀՀ վարչապետ Նիկոլ Փաշինյանը՝ անդրադառնալով ՀՀ երկրորդ նախագահ Ռոբերտ Քոչարյանի նկատմամբ Վերաքննիչ դատարանի որոշմանը:
Նա անդրադարձավ նաեւ ՄԻԵԴ-ում Հայաստանին վերաբերող գործերին՝ նշելով. «Մեզ մեղադրում են դատական գործերի մեջ միջամտելու մեջ: Սկզբից գաղափար կար, որ մեր պետության հեղինակությունից ելնելով, որպես կառավարություն այնպես անենք, որ ՄԻԵԴ-ում բոլոր գործերն այնպես անենք, որ դրանք չդառնան դատավճիռ:
Հիմա մենք այդ ճանապարհով չենք գնալու, թող գնան Ռոբերտ Քոչարյանի եւ Սերժ Սարգսյանի իշխանության օրոք եղած գործերը պարտվեն Եվրոպական դատարանում եւ հետ գան: Այ էդ ժամանակ իրենք պատասխան տան, թե այդ ոնց է եղել, որ տասնյակ գործերով ապօրինի դատավճիռներ են կայացվել եւ այդ դատավորները ոչ մի պատժի չեն ենթարկվել Հայաստանում»:
Ավելի վաղ NEWS.am-ը հայտնել էր, որ 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քրգործով ՀՀ երկրորդ նախագահ Ռոբերտ Քոչարյանին, ՀՀ պաշտպանության նախկին նախարար Միքայել Հարությունյանին եւ ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը:
Ռոբերտ Քոչարյանը ընդհանուր իրավասության դատարանի որոշմամբ կալանավորվել էր երկու ամսով, սակայն վերաքննիչ դատարանը օգոստոսի 13-ին որոշում է կայացրել ազատ արձակել նրան՝ հիմնավորելով, որ ՀՀ երկրորդ նախագահն անձեռնմխելի է:
Ռոբերտ Քոչարյանն ազատ արձակվեց. դատարանը բավարարեց պաշտպանական կողմի միջնորդությունը
