Ես երբեք բարդույթներ չեմ ունեցել եւ երբեք իմ մասին վատ կարծիքի չեմ եղել, բայց երբ պետական ողջ մեքենան կազմակերպված ձեւով՝ պետության խնդիրները թողած, երեկ ամբողջ գիշեր եւ այսօր ամբողջ օրը, համակարգված ձեւով՝ նախարարություններով, կազմակերպություններով, ավագանիներով զբաղված են ինձանով, անկեղծ ասած՝ սեփական ինքնարժեքիս մասին կարծիքս էլի բարձրացավ։ Այս մասին ասաց Երեւանի քաղաքապետի ԲՀԿ թեկնածու Նաիրա Զոհրաբյանն այսօր՝ սեպտեմբերի 17–ին, Նոր Նորքի ընտրողների հետ հանդիպմանը։
Նա անդրադարձավ Մալաթիա–Սեբաստիա համայնքում երեկվա իր ելույթին, որում «Իմ քայլը» դաշինքի թեկնածու Հայկ Մարությանին բանավեճի էր հրավիրում. «Ես չէի պատկերացնում, որ ճշմարտությանը կարող է լինել այդպիսի ցածր արձագանք»։
«Վիրավորակա՞ն է ինձ համար որպես կնոջ՝ վիրավորական է, ցավալի՞ է ինձ համար որպես կնոջ՝ իհարկե ցավալի է։ Կոտրվե՞լ եմ ես դրանից, ոչ, երբեք, որովհետեւ բոլորը գիտեն, որ ես կոտրվող տեսակ չեմ, բոլորը գիտեն, որ ինձ վախեցնել հնարավոր չէ, ինձ ահաբեկել հնարավոր չէ, ինձ սպառնալ հնարավոր չէ»,–ասաց Նաիրա Զոհրաբյանը։
Պետական ինստիտուտներին նա մեղադրեց իրեն պատերազմ հայտարարելու համար. «Չէի մտածում, որ ամբողջ պետությունը, պետական ողջ ինստիտուտները, իրենց գործը թողած, սոցիալական ցանցերում՝ պետական ողջ ռեսուրսներով վարձած ֆեյքերի միջոցով պատերազմ են հայտարարելու»։
Նաիրա Զոհրաբյանի համոզմամբ, դա վկայում է իրենց՝ ճշմարիտ լինելու մասին։
Թեկնածուն կոչ արեց չվիրավորել միմյանց. «Այսօր սեւի եւ սպիտակի խնդիր չկա, այսօր հերոսի եւ դավաճանի խնդիր չկա, այսօր դուխովի եւ անդուխի խնդիր չկա, այսօր ինձ համար, որպես պատգամավոր, քաղաքացի, քաղաքապետի թեկնածու, կա ընդամենը մեկ ջրբաժան եւ այդ ջրբաժանը անցնում է Երեւանի լուծված եւ չլուծված խնդիրների միջով»։
Նշենք, որ Երեւանի ավագանու ԲՀԿ ցուցակի առաջին եռյակում են Նաիրա Զոհրաբյանը, Պետրոս Ղազարյանը, Արման Աբովյանը։
Երեւանի ավագանու ընտրությունները տեղի են ունենալու սեպտեմբերի 23-ին: Քարոզարշավը մեկնարկել է սեպտեմբերի 10-ին եւ կշարունակվի մինչեւ սեպտեմբերի 21-ը: Ընտրություններին մասնակցում է 12 քաղաքական ուժ: