Երեւանում առաջնային խնդիրն այսօր աղբահանության հարցն է։ Այս մասին այսօր՝ սեպտեմբերի 18-ին հրավիրված մամուլի ասուլիսին հայտարարեց ՀՀ արդարադատության նախարար, Երեւանի ավագանու ընտրություններին «Լույս» դաշինքի քաղաքապետի թեկնածու Արտակ Զեյնալյանը։
«Մտնում ես բակ, գարշահոտությունը կանգնած է բակում եւ ամենուրեք, այդ աստիճան սուր է այսօր աղբահանության հարցը Երեւանում»,–նշեց նա՝ շեշտելով, որ աղբահանության հարցն անմիջականորեն խփում է զբոսաշրջությանը։
Քաղաքապետի թեկնածուն, սակայն, համոզված է՝ Երեւանի աղբահանության խնդիրը բազմաշերտ խնդիր է, այն թողնել միայն օպերատորի վրա սխալ կլինի։
«Դա պայմանավորված է նաեւ աղբավայրի որակով, աղբավայր տանող ավտոճանապարհի որակով։ Թափոնները երկրորդային հումք է, եկամտի աղբյուր է, էներգիայի այբյուր է, սակայն մեզ մոտ շատ քիչ է օգտագործվում դա որպես երկրորդային հումք։ Մենք փորձելու ենք մաքսիմալ օգտվել դրանից»,–եզրափակեց նա։
