Գերմանիան պետք է Ֆեթուլահ Գյուլենի հետեւորդներին ահաբեկիչներ ճանաչի, հայտարարել է Թուրքիայի նախագահ Ռեջեփ Թայիփ Էրդողանը Բեռլինում Գերմանիայի կանցլեր Անգելա Մերկելի հետ հանդիպմանը, գրում է BBC-ն։
Էրդողանը կոչ է արել Գերմանիային հանձնել Գյուլենի հետեւորդներին, որին ինքը մեղադրում է 2016-ի պետական հեղաշրջման փորձի մեջ։
Անգելա Մերկելը մամուլի ասուլիսի ժամանակ հայտարարել է, որ Գերմանիային լրացուցիչ ապացույցներ են պետք այդ գործում։
Նա նաեւ կոչ է արել Թուրքիային որքան հնարավոր է արագ լուծել Թուրքիայում ազատազրկման դատապարտված Գերմանայի քաղաքացիների հարցը։
Նշենք, որ Թուրքիայի նախագահը եռօրյա պետական այցով ժամանել է Գերմանիա՝ ձգտելով լավացնել հարաբերությունները Բեռլինի հետ, որոնք վատթարացել էին 2016 թվականի հեղաշրջման փորձից հետո տեղ գտած ռեպրեսիաների պատճառով։