Չի կարելի ժողովրդւի ձայնով հայտնվել Ազգային ժողովում եւ արհգամարել ժողովրդի ձայնը։ Այս մասին այսօր՝ հոկտեմբերի 1-ին լրագրողների հետ զրույցում ասաց ՀՀ ԱԺ «Ծառուկյան» խմբակցության պատգամավոր Գեւորգ Պետրոսյանը։
«Բարգավաճ Հայաստան» կուսակցության համար միշտ կարեւոր է եղել ժողովրդի կարծիքը, որովհետեւ կուսակցությանը ժողովուրդն է գործուղել ԱԺ։ Չի կարելի, որ որեւէ կուսակցություն ժողովրդի ձայնով հայտնվի ԱԺ–ում, հետո արհամարի ժողովրդի կամքը։ Չի կարելի նաեւ իշխանության ներկայացրած ցանկացած նախագծի կուրորեն ենթարկվել՝ պատճառաբանելով, որ այդ նույն իշխանությանն էլ է ժողովուրդը գործուղել իշխելու մեզ, այսինքն՝ մենք որեւէ տարբերակի, որեւէ նախագծի ինքնին առանց հիմնավորման կողմ կամ դեմ չենք»,–նշեց նա։
Պատգամավորը շեշտեց՝ պետք է նախ հասկանալ նախագծի հեղինակի հետապնդվող լեգիտիմ, իրավաչափ նպատակները. «Մենք ուզում ենք հասկանալ ցանկացած նախաձեռնության բուն էությունը, դրա կողմից հետապնդվող լեգիտիմ, իրավաչափ նպատակները եւ նաեւ վերլուծել այն հավանական տարբերակները, այն հավանականությունը, թե որքանով է նախագծի հեղինակի ցանկությունը ողջամտորեն հնարավոր իրականացնել իր իսկ մատնանշած ժամկետներում»։
Նա կոչ է անում լինել համբերատար, տեսնել, թե կառավարությունն ինչպիսի նախագիծ կհանձնի հանրության դատին ու ԱԺ խմբակցություններին. «Այն ժամանակ մեր խոսակցությունը կլինի ավելի առարկայական»։
Հարցին՝ վարչապետի հայտարարությունը, թե խորհրդարանը վստահություն չի ներշնչում, նաեւ ԲՀԿ–ին նկատի ունե՞ր, պատգամավորը հայտնեց. «Ես այդ հայտարարությանը ուղղակի դեմ եմ, որովհետեւ եթե խորհրդարանը չի արտացոլում հասարակության կարծիքը, ցանկությունը, բա ինչո՞ւ վարչապետն ընտրվեց այդ խորհրդարանի կողմից, ինչո՞ւ է վարչապետը գալիս ԱԺ, եթե գտնում է, որ այն լեգիտիմ մարմին չէ, բա գալիս է ոչ լեգիտիմ մարմնի հետ կարծիք քննարկելո՞ւ»։
Նա հակված է մտածել, որ այդ հայտարարությամբ նրանք նկատի ունեն Երեւանի ավագանու ընտրություններում իրենց տարած հաղթանակը. «Բայց պետք չէ ավագանու ընտրություններն ընդունել որպես լակմուս ամբողջ հանրապետության, ազգաբնակչության, քաղաքական դիրքորոշումները, քաղաքական գնահատականները կանխորոշելու համար։ Կլինեն համապետական ընտրություններ, ժողովուրդը ցույց կտա՝ որ քաղաքական ուժին որքան է վստահում»։
Գեւորգ Պետրոսյանը սխալ է համարում, երբ մի պետական մարմին իր հեղինակությունը կառուցում է մեկ այլ պետական կառույցի հեղինակության հաշվին։
