Եվրասիական ինտեգրացիայի թեման ավելի ու ավելի հեռանկարային է դառնում երիտասարդ սերնդի համար։ Մենք հուսով ենք, որ այս շաբաթվա արդյունքը կլինի այն, որ դուք կվարակվեք ինտեգրացիայի գաղափարով։ Այս մասին հայտարարել է ԵՏԿ կոլեգիայի նախագահ Տիգրան Սարգսյանը՝ ԵՏԿ մոսկովյան գրասենյակում Եվրասիական ինտեգրացիայի միջազգային դպրոցի բացման արարողության ժամանակ։
Այս տարի դպրոցի թեման է՝ «Եվրասիական տնտեսական միություն․ տնտեսության ապագա ուրվագծերը»։ Ուսուցումը կանցկացվի հոկտեմբերի 1-5-ը։ Հայաստանի, Բելառուսի, Ղազախստանի, Ղրղզստանի եւ Ռուսաստանի պետական մարմինների եւ բիզնեսի փորձագիտական հանրության ներկայացուցիչները «առաջին ձեռքից կստանան Միության մասին ամենամանրամասն տեղեկատվություն»՝ նշել է Սարգսյանը։ Ձեռք բերված գիտելիքների հիման վրա դպրոցի մասնագետները կմշակեն եւ Հանձնաժողովին ու Միջազգային գործերով ռուսական խորհրդին (РСМД) կներկայացնեն եվրասիական ինտեգրման զարգացման իրենց տեսլականը։ Լավագույն առաջարկները կարող են օգտագործվել ԵՏԿ-ի գործնական աշխատանքում։
Սարգսյանն ընդգծել է հիմնական թեմաները, որոնք պետք է բարձրացվեն պարապմունքների ժամանակ։ Մասնակիցները լիարժեք պատկերացում կկազմեն Եվրասիական տնտեսական միության մասին՝ ստեղծման պատմությունից մինչեւ ժամանակակից իրավիճակն ու զարգացման հեռանկարները, ինչպես նաեւ կծանոթանան այն հնարավորություններին, որ ԵՏՄ-ն բացում է բիզնեսի համար՝ Միության երկրների քաղաքացիների կյանքի անբաժանելի մասը դարձած ինտեգրման արդյունքում։ Չեն շրջանցվի նաեւ խնդիրները, որոնց բախվում է Միությունը, ինչպես նաեւ՝ առկա ռիսկերն ու սպառնալիքները։ Հատուկ ուշադրության կարժանանա ԵՏՄ-ի միջազգային գործունեությունը, մասնավորապես՝ եվրասիական ինտեգրման դերն ու տեղը համաշխարհային փոփոխվող կառուցվածքում։
Դպրոցն անցկացվում է արդեն 4-րդ անգամ։ Հարթակը կախված է նրանից, թե որ երկիրն է նախագահում ԵՏՄ մարմիններում։
Տիգրան Սարգսյանը ընդգծել է, որ Միությունը կարիք ունի ակտիվ բարձր պրոֆեսիոնալ կադրերի, որոնք կդառնան ինտեգրացիոն գործընթացներն առաջ մղողները։ «Մենք մեզ համար հստակեցրել ենք կարեւոր նպատակ՝ եվրասիական էլիտայի ձեւավորումը։ Հենց այդ պատճառով էլ ստեղծել ենք այս դպրոցը ձեզ համար»,- ամփոփել է ԵՏԿ-ի նախագահը։